أطرف ردود النشطاء على «اتنصب عليك قبل كده».. أسامة: «نصبت على صاحبي في كارت شحن».. عبادي: «اشتريت شقتين فول بـ550 جنيها».. مصطفى: «اتسرقت مرتين في نفس المكان»..
لم ينجو أحد من «فخ النصب»، فعلى الرغم من الحذر الشديد من «النصابين»، إلا أننا نسقط كضحايا لهم في مواقف مختلفة دون أن ندري.
وفى هذا الإطار، أجاب مستخدمو موقع التواصل الاجتماعى "فيس بوك" على سؤال "اتنصب عليك قبل كده" والذي طرحته صفحة "الكومنت الفصيل" عبر "فيس بوك" وعلقوا بأطرف عمليات النصب التي تعرضوا لها.
- أكلت علقة عنب بسبب نصب ولد عليا
قالت غادة:" ماما مرة ادتنى فلوس اشترى عدس فكنت جمب المحل، ولد قالى هاتي وأنا أجبلك دول هيدونى كتير علشان أعرفهم وخد الفلوس واختفى، وفضلت قاعدة وقت طويل مستنياه لقيتهم جايين بيدوروا عليا، وأنا أحلف إن الولد راجع بس أكلت علقة يومها عنب".
قال حسن: " وأنا بركب المترو وكنت تعبان ومش مركز خالص حطيت التذكرة في المكنة وعديت من مكان تانى ومفتحتش المكنة، حاولت أعدى ورا أي حد معدي معرفتش وكسلت أرجع أقطع تذكرة تانية فالراجل من بتوع الأمن كبير في السن وشكله غلبان قالي تعال يابني مدوخش نفسك نط من فوق الماسورة دى وعدى قولتله شكرا ياعم الحاج وأول ما نطيت لاقيته مسكني وقاللى عشرة جنيه غرامة، ياعم الحاج ده انت اللى قولتلى نط قالى عشرة جنيه غرامة ودفعت العشرة وأنا بقوله ياحاج يابن النصابة".
- نصبت على صاحبي في كارت شحن
وقال أسامة: "واحد صحبي كان بيشحن كارت في الموبايل وأنا جنبه وشحنت الكارت قبله فضل يقول الشركة بتشتغلني وحرامية إزاي يحصل دا صعب عليا وحولتله 5 جنيه من الكارت".
- اتسرقت مرتين في نفس المكان
وأضاف مصطفى: "كنت بشتري من السيد البدوي حاجات حلاوة وكدة فاتسرق مني الفون والفلوس روحت تاني يوم وقلت هحط عيني في وسط رأسي وأشوف مين اللي بيسرق وهمسكه أطلع عينه.. روحت اتسرقت برضوا واتاخد مني الفلوس وروحت قفايا يأمر عيش..هفأ هفأ يعني مش هزار".
- نصاب الفكة
وروت هبة: "زمان وأنا في تالتة ابتدائي كنت بقعد في محل والدي الله يرحمه وكل يوم العصر يجي شخص يقولي فكي العشرة جنيه دي جنيهات أعدهم عشرة وأديهمله يقولي لا 9 أديله جنيه ويمشي وكل يوم يجي وكل يوم العشرة يبقوا 9 وفي يوم جه شاف أبويا قام مشي قمت بقوله تعالى فك من أبويا هيعدلهمك صح فالواد جري أبويا بيسألني قولتله قالي وده متوظف عندنا من امتى بقا قولتله كل يوم كل يوم".
- شقتين فول بـ550 جنيها
وقال عبادي محمد: "كنا لسه راجعين من السعودية بعد 17 سنة هناك، المهم أبويا بعتني السنترال أدفع فواتير التليفون وكانت بـ550 جنيها، دخلت السنترال لقيت زحمة رهيبة وطوابير وأنا مش عارف أروح فين واتصرف ازاى وفضلت واقف متنح شوية ولقيت واحد داخل عليا وحاطط قلم في ودنه "ده اللى خلاني أثق فيه" أنه حاطط قلم في ودنه وقالى مالك ملخوم كده ليه! قولتله معايا 550 جنيها وعايز ادفع فواتير للأرقام دي، قالي هخدمك عشان شكلك مش عارف تتصرف".
وأضاف: "وقالي هات الفلوس وأرقام التليفون وأنا هادفعهملك بس هستاذنك خود النص جنيه ده وهاتلي شقتين فول من العربية اللي هناك دي.. ولما لقاني تنحت ضحك وقالي قصدي سندويتشين فول يعني، خدت منه النص جنيه واديته الـ550 جنيها وفضلت ادعيله رحت اشتريت السندويتشين ورجعت استني ساعة، ساعة ونص، ساعتين، لحد ما لقيت أبويا جه وقالي إيه للي مأخرك.. فحكيتله وقلتله راجل ربنا يكرمه دفعلي الفواتير واداني أجيبله سندوتشين وأنا مش عايز أمشى لحد ما اديله السندوتشات بتاعته، أبويا قعد على الرصيف، وقالي أنا غلطان إني جيبتك من السعودية، وفين وفين لما اقتنعت إنه نصب عليا وأبويا أصر إنه ياكل السندويتشين اللي بـ550 جنيها دول".
- شارع الحرامية
وأضاف فيصل: "مرة واحد صاحبي قرر يكون شاطر، في شارع عندنا معروف اللي يعدي منه لازم موبايله يتسرق، فقرر يمشي ويكون حريص على جيبه عشان يشوف مين اللي بيسرق ويمسكه المهم عدا من الشارع وهو فرحان إن محدش سرقة الموبايل، بس يكتشف للأسف أن المحفظة اتسرقت من جيبه التاني".
