نشطاء يودعون 2016 بكلمات حزينة.. نينا: أسوأ سنة في حياتي.. محمد: غيرتي فيا كتير.. نهي: حصل فيكي كل حاجة وعكسها.. أحمد: ضحكت فيكي وبكيت.. وهبة: سكة السلامة
دشن نشطاء مواقع التواصل الاجتماعي «فيس بوك وتويتر»، "هاشتاجًا" بعنوان «كلمة وداع لـ 2016»، وذلك لتوديع عام 2016، التي شارفت على الانتهاء، مؤكدين أن هذا العام قد شهد عددا كبيرا من المآسي والأزمات، التي عانوا منها كثيرًا، متمنين أن يأتي عام 2017 بالخير لهم.
أسوأ سنة
قالت نينا: «كلمه وداع لـ2016.. أسوأ سنه عديتى عليا اخلصى بقى كفايه كده»، وأضاف نمر تويتر: «سنة كبيسة»، وأكدت هايدي محمد أنها «أكثر سنة وحشه في حياتها»، ورد محمد يوسف: «كلمة وداع لـ2016.. هتفضلى من السنين اللى مش ممكن تتنسى طول عمرى الحزن والفرح فيكى مميزين جدا... غيرتى فيا حاجات كتير.. كله محصل بعضه».
وتابع إبراهيم حسن: «أخلصي بقي أبوس أيديكي أنت أسوأ سنة شفتها في حياتي الحمدلله مع إن فاضل كام يوم وحاسسهم مش هيخلصو».
كفاية
قال عيسو حسن: «بعد 12شهر نكد وكمان عايزاني أودعك أمشي يا سنه سيئة ومالكيش دعوه بـ 2017 دي السنه اللي الأمل فيها بلاش تنحسيها يا نحس»، وأضاف كات أهلي: «كفايه وأخلصي.. روحى منك له»، وعلق زومبيس: «كلمة وداع لـ2016.. روحي يا شيخة ربنا ما يكتب علينا سنة زيك أبدًا».
ورد عماد حسام: «كلمه وداع لـ2016 زيك زى غيرك مشينا معاكى يوم وشهر وأسبوع وبردة لقينا غيرك مش تتجملى علينا انتى قدرنا وأكيد هتبقى لاقدر الله»، وتابعت هبة: «طب ممكن أغنيلها سكة السلامة».
الفرح والحزن
قال أحمد الشيخ محمد: «ندعوا الله أن يستفيد كل صاحب حق من المحن التي مر بها هذا العام ليجعلها منح؛ اللهم أشفى كل مريض وفك كرب كل مكروب».
وأضاف أحمد فتحي: «سنه جديدة على الأبواب، لا تطلبون من السنوات أن تكون الأفضل كونوا أنتم الأفضل فيها، فنحن من نتغير أما هي فتزداد أرقاما فقط».
وعلقت نهي إعلامية المعلمين بقولها: «حصل فيكى كل حاجة وعكسها الحزن بزيادة والفرح بزيادة..اتمنى ربنا يتقبل منى أي خير عملته فيها ويتجاوز عن سيئاتى بها»، وردت يسرية الصاوي: «أخدتى أغلى الأصحاب».
وكتب أحمد السيد: «مع السلامه وما اشوفش وشك تاني»، بينما قال أحمد العبد:« بداتي بزنقه الثانويه وبعديها الامتحانات بس فرحتيني بالنتيجة وزعلتيني بالتنسيق يامه ضحكت فيكي ويامه زعلتيني بس شكرًا».
وأضاف محمد طير البر: «كلمه وداع لـ2016.. بصي أنا مش هكلمك أمشي من وشي الساعة دي».
