«الصعيد المنسي» قصيدة للشاعر محمود الحوامدي

أنا الصعيد المنسي وليه يا بلد نسياني
طب ليه تدفنوني ياناس وأنا مانيش جاني
دا كل اللي عليكم دي من قطني وكتاني
تعيشوا أنتوا وموت أنا مش لاقي أكفاني
صابر أنا والهم على الصبر رباني
خايف اقول الأه لحد الخوف معاراني
ولما اقول الأه تقومي انتي جالحة خنقاني
دا أنا اللي بايع دمي ليكي وللموت لو جاني
ليه يابلد تشتري الغريب وابنك أنا بيعاني
ليه متشترنيش وليه في الغربة سيباني
لساني بقول الأه ولساني فيكي بعاني
كُنت ديما بقول بلدي في القلب شيلاني
بلدي الاصيلة وهي الضهر سنداني
بلدي بنيلها روي أرضي وروياني
بلدي بجيشها عاشت وهي اللي حمياني
ولما أميل بحملي عليكي تقولي على أناني
دا أنا المغشوش وأنا المظلوم في أوطاني
وأنا الساكت وأنا المسجون في غيطاني
ولما صرخت حضني قبرك وغطاني
أنا الزارع طينك وانا اللي في حضارتك باني
تطرحيلي ياوردة شوك بعد مازراعتك في بستاني
دأنا اللي فيكي عاشق وحبك نهر جواني
مادح أنا ارضك وانتي ديمًا جرحاني
يا محملاني همومك أمتي مزانك علاني
عايش في ضل لليلك وعايشة جواي احزاني
نشفت دموع عينيك وأنا دموعي غرقاني
عـمري مـا شـفتك يوم في وجـعي سـألاني
ياللي انتي هواكي الموت وبايتة في احضاني
يا ما غرقاني في دمك وبنارك محوطاني
أنا المقتول على شطك وانتي اللي قتلاني