بالصور.. أطرف كوارث المتزوجات حديثا في المطبخ
تتعرض المرأة في بداية الزواج لمواقف محرجة وطريفة داخل المطبخ خاصة وإن كانت لا تجيد الطبخ، مما يؤدى لإنهاء وجبتها بكارثة.
تداول مستخدمو موقع التواصل الاجتماعى "فيس بوك" مجموعة من مواقف السيدات في بداية زواجهن داخل المطبخ، وما ترتب عليه من مشاهد طريفة، من بين تلك المواقف:-
قالت إحدى السيدات " غسلت الخلاط كلة بالموتور تحت الميه وجيت اشغله فرقع ف وشى "، وأضافت أخرى "أنا طلب مني اعمله كشري علشان بيحبه دخلت وطلعت ميت مره من المطبخ وبعد تلات ساعات سالني عملتي الكشري عيط وقلتله مبعرفش اعمل اكل اصلا".
واعترفت عروس أخرى قائلة " انا حبيت اعمل نفسي زي الشيفات الكبار وجيت اقلب الاكل فالهوا هو إلى حصل انا لاقيت خير اللهم اجعله خير نار مولعه في البوتجاز كله والاجزاء المحيطة ومن بعدها جوزي شاف المنظر قالي ياريت لما تحبي تحرقي البيت تاني اكون هنا عشان انقذ ما يمكن إنقاذه بس الحمد لله مفيش خسائر بشريه وانا اتعلمت اني متفرجش على برامج اكل فالتليفزيون تاني ابدا".
و من المواقف المتداولة أيضا " انا عملت صنية البطاطس دي اكتر من ١٠مرات ف كل مرة أعمل مصيبة مرة أنسي السمنة،ومرة أنسي البصل ومرة أنسي الطماطم ومرة أنسي الشوربة وآخر مره هههههههههههه قلت ايه الهبل اللى انا فيه ده مكنتش ام صنية بطاطس انا زهقت وكتبتهم ف ورقة وبعد ما حطيت الصينية ف الفرن وقربت تستوي بفتح الفرن لقيتني نسيت أحط البطاطس.
واستطردت أخرى: كنت بسلق بيض ونسيته والله ماهتصدقوا سمعت صوت انفجار جامد في المطبخ طبعا روحت على باب الشقه الأول وبعد لما اطمنت أن مفيش اصوات لانفجارات تانيه رحت ببطء شديد للمطبخ وبصيت من بعيد على الأجهزة الكهربائيه لقتها بخير والحمد لله ولقيت الكسروله اللي كنت بسلق فيها البيض متفحمه والبيض اشلاء في المطبخ كله معرف نيوتن مقلش ليه أن البيض بينفجر عند زياده درجه الحراره بيستهبل ده.
وردت عليها فتاة أخرى: أنا أول لما اتجوزت عملت ملوخية وجوزي قالي طول عمري اعرف أن الملوخية بتسقط لتحت لكن انتي سقطيها لفوق ازاي..ازاي خليتي الملوخية فوق والشوربة تحت.
- عملت لحمة ع الفحم مكنتش أعرف إنها ليها لحمه معينه قعدت أسوى فيها ع الفحم ما استوتش بعد ما اتحرقت طبعا جبت مايه وسلقتها تانى لاقيت الشوربه سوده طلعتها وشوتها تانى ع الفحم وجه جوزى ياكل بيقولى ايه ده قلتله لحمه ع الفحم قالى أيوه ده الفحم فين اللحمة.
