«أحمد جبلي» شاب أبكي نشطاء «مواقع التواصل».. توفى إثر سقوطه على رأسه في بيته عن عمر الـ27.. أصدقاؤه: «كان ملتزمًا ووقورًا».. «مات بعد سنة من الزواج بحبيبته»..&#
حالة من الحزن الشديد سيطرت على مواقع التواصل الاجتماعي «فيس بوك وتويتر»؛ لوفاة الناشط في مجال المؤسسات الخيرية أحمد جبلي، عن عمر يناهز 27 عامًا، الذي لم يمر على زواجه العام، حيث توفى إثر سقوطه على رأسه في بيته، فما كان من أصدقائه إلا أن دشنوا له صفحة باسمه نالت إعجاب 32 ألف شخص خلال سويعات قليلة، كما دشنوا له هاشتاج باسم «أحمد جبلي» يكشفوا فيه عن مآثر الشاب الذي امتلك احترام أصدقائه وكل من سمع عنه.
حديث زوجته
كتبت عنه زوجته رضوى جلال حامد: "حبيبي كان دائمًا بيقولي أنا عارف إني هموت صغير، كنت بتضايق منه وأقوله وأنا مالي يا عم مش عاوزة أعيش لوحدي أرملة، بس يا حبيبي السنة اللي عشتها معاك تستاهل أي حاجة الحمد لله اللي شرفني إني كنت زوجتك وحبيبتك سنة، ده كرم من عنده، ربنا دوقني حتة من الجنة في الدنيا بسببك، ربنا يجعل ابنك خير وريث ليك ولحب الناس ليك ربنا يرحمك ويجعلك في أعلى عليين".
صلاة الفرح
وأضافت زميلته مي بدر: "إنا لله وإنا إليه راجعون جبلي... النهارده ربنا اختارك.. جبلي.... العريس اللي صلى أمام بأصحابه يوم فرحه في وسط الفرح.. جبلي... اللي مكنش يتكسف يقول أعشق زوجتي ودائمًا فخور بيها ومقتدي بسنة سيدنا النبي مع زوجاته.. جبلي... اللي أمه تاج على رأسه ورضاها بالدنيا.. جبلي... بونبوناية التيار الإسلامي زي ما كان صحابه بيقولوا من كتر تدينه وانخراطه فـ أعمال الدعوة وحسه المرهف.. جبلي.. اللي عمري مشفتهوش زعل من حد انتقده أو زعَّل حد انتقده.. الناس الحلوة مبتقعدش ربنا اختارك... ربنا يصبر أهلك وينزل السكينة والصبر على قلب أمك وزوجتك وابنك اللي اتحرم من حنانك وملحقش يشوفك إنا لله وإنا إليه راجعون".
صلاة الجنازة
وقال عمر شاذلي: "كمية الناس اللى صلت في صلاة الجنازة على أحمد جبلي رهيبة، لقيت مكان أصلي فيه بالعافية، وده من علامات حسن الخاتمة، نحسبه ولا نزكيه".
وأضافت منة عبد الحق: "أحمد جبلي مات بعد سنة جواز مع حبيبته، ومراته حامل في الشهور الأخيرة، نسألكم الدعاء والمغفرة له، هتكون من أهل الجنة أكيد".
دروس دينية
وعلق أيمن رؤية: "ما الذي بينك وبين الله يا أحمد جبلي لم يصلِ عليه الجنازة ولم يدفن بعد وتم عمل عمرة له، وبعض معارفه تواصلوا مع إمام المسجد الحرام وسوف يصلون عليه صلاة الغائب، أصدقاؤه وأقاربه وكثير من الناس يعرفونه ولا يعرفونه يتجمعون للصلاة عليه، حزن عليه كثير من الناس سواء كانوا يعرفوه أو لا يعرفوه، الكثير نوى التوبة بعد سماع خبر وفاته، أحمد جبلي اللي ما يعرفوش هو مهندس شاب عنده 27 سنة، كان معروف بالمشاركة في تنظيم الدروس الدينية بالذات في مسجد يوسف الصحابي في مصر الجديدة، كان بيحضر الدروس دي بالآلاف بدون مبالغة، كان إنسان خلوق ومحترم... أحمد مكنش مريض.. معملش حادثة.. أحمد كان واقف في بيته وفي ثانية وقع توفى.. الموت في أي لحظة... مش بيفرق بين صغير وكبير.. أو بين مريض وسليم.. اللهم ارحمنا إذا صرنا إلى ما صار إليه.. وارزقنا بمن يدعو لنا بعد وفاتنا.. ربنا يرحمك يا أحمد ويرحم كل أمواتنا.. إِنَّا لِلّهِ وَإِنَّـا إِلَيْهِ رَاجِعونَ".
وتابعت سارة سامي: "أحمد جبلى العريس اللى صلى أمام يوم فرحه يارب ارحمه واربط على قلب زوجته وأهله، إنا لله وإنا إليه راجعون".
