ياميدو: اشرب اللبن ونام
قلنا منذ البداية أن سبب نكبة الزمالك في مسئوليه..حذرنا من الفكرة الهبلة لمجلس الدكتور كمال درويش الخاصة بالتعاقد مع ميدو الذي لم يعلن اعتزاله الكرة لتدريب فريق بحجم الزمالك..قلنا ميدو لسه صغير والجميع رفض أن يصدق..قلنا إن خبراته زيرو ولا أحد يريد أن يقتنع..كل هذا والفريق يتجرع الهزيمة تلو الأخري وميدو يرفض العلام..
راح مجلس درويش وأتي مجلس جديد ولا تغيير كل طلبات مستر ميدو مجابة..عايزين نغير هشام يكن وطارق السيد..والمجلس يقول آمين..عايز أجيب زميلي وصاحبي عالقهوة يبقي مدرب عام..ماشي ياميدو..لا مدير الكرة مش شايف شغله عايز واحد تاني والمجلس آمين..بصراحة أنا مش شايف العيب في ميدو لأن الراجل بيدرب بفلوسه إنما العيب في الإدارة اللي فاكرة نفسها بتنفذ المبادئ والقيم وحريصة على أنها تمنح المدرب المعجزة فرصته كاملة رغم أنه أصلا تولي المهمة في وسط الموسم..
الواضح أن العيب في الجمهور اللي مش قادر يغير ولسه عايش على أمجاد مدرسة الفن والهندسة ياناس فوقوا ده فريق فشل أن يفوز على الأهلي من فترة طويلة جدا وفشل في الفوز بالدوري من عشر سنين وفاكرين أن ميدو هو اللي هيجيب الديب من ديله...أنا فيه كلمتين محشورين ولازم أقولهم للأخ ميدو اللي بيفكرني بالمغني اللي بيغني غصب عن المستمعين وكل ما أشوفه افتكر الملك فريد شوقي في أحد أدواره لما حب يغني بالعافية ويقول والله زمان..زمان والله ولما واحد من الجمهور قال رأيه نال علقة ساخنة..
أري أن ميدو يريد أن يكون مدربا بلا أي مؤهلات لا دورات ولا خبرات والناس بره لازم ياخدو دورات عشان ينجحوا لكن ميدو عرف سكته وفي النهاية لا أملك إلا أن أقول له يا ميدو:اشرب اللبن واتغطي ونام يمكن نومك مصلحة للزمالك.
