قيدوه بالحبال وربطوه في عمود النور، أهالي المريوطية يمسكون لص بطاريات (فيديو)
لص بطاريات السيارات، تداول نشطاء مواقع التواصل الاجتماعي مقطع فيديو مثيرا، يظهر فيه أهالي منطقة المريوطية في محافظة الجيزة، وهم يمسكون شخصًا وصفوه بأنه "لص" بطاريات السيارات، وقاموا بتقييده بالحبال وربطوه في عمود كهرباء، حيث أمسكوا به بعد ملاحقته أثناء محاولته هربه.
بعد دوخة أهالي المريوطية يمسكون بلص بطاريات السيارات
وأكد شهود العيان أن أهالي المريوطية كانوا يعانون من سرقة بطاريات سياراتهم، وكانوا يبحثون عن لص البطاريات منذ أشهر، وبعد فترة من البحث وقع "لص البطاريات" في "كمين شعبي"، وقاموا بتقييده في عمود الكهرباء خوفًا من أن يقوم اللص بمعاودة نشاطه بسرقة بطاريات السيارات بعد القبض عليه، موضحين أنه سيدفع الغرامة وسيخرج، لذا قاموا بهذا التصرف لردعه.
وكشف شهود العيان لص بطاريات السيارات بالمريوطية أن "لص بطاريات السيارات تم الإمساك به من قبل الأهالي أثناء محاولته فك بطارية إحدى السيارات التي كانت متوقفة في أحد شوارع المريوطية، لذا قام الأهالي بمطاردته، وبالفعل تمكنوا من الإمساك به وتقييده بالحبال في عمود الكهرباء، ليكون عبرة لغيره".
أثار إمساك الأهالي بلص بطاريات السيارات في المريوطية جدلًا واسعًا بين نشطاء مواقع التواصل الاجتماعي، حيث علق البلوجر يحيي محمد قائلًا: "بعد مادوخ الأهالي شهور.. لص البطاريات ربطوه في عمود النور! لص البطاريات في المريوطية، وقع في "كمين شعبي" ملوش حل، بعد عذاب ودوخة.. والرجالة قرروا يخلوه "عبرة" وربطوه في عمود النور!".
انقسام الآراء بين مؤيد لربطه بعمود الكهرباء ومعارض
وقال البلوجر أحمد نور الدين: "إيه رأيكم في المشهد.. انقسمت الآراء الى فريقين، وكل فريق عنده وجهة نظر: الفريق الأول قرر ربط اللص وتأديبه، بيقولوا "ده الصح، أصله بيروح القسم ويخرج بعدها بكفالة ويرجع يسرقنا تاني.. العين بالعين والعمود للمفسدين!. والفريق الثاني طالبوا بتحكيم (سيادة القانون)، فقالوا: "إحنا مش في غابة، في حكومة وقانون، ربط الناس في العواميد ده منظر يسيء لينا، ومهما عمل لازم يتسلم للشرطة وهي تتصرف.. الدنيا مش سايبة!". لو كنت مكان الأهالي وشفت اللص ده بيفك بطارية عربيتك.. هتعمل إيه؟ اللي يسرق يستحمل!".
وقال البلوجر يسري واصل: "المصيبة أنه ممكن يرفع قضية تعذيب وتشهير ويكسبها".
ورد البلوجر مدحت باسل قائلًا: "حصل موقف زى ده مع واحد غريب، وكان اللي بيضربوه هما اللصوص وبلطجية المكان محدش مد إيده عليه اكتفوا بتسلميه للشرطة".
وقالت البلوجر أميرة فاروق: " يعني بقاله شهور بيسرق هل اغتني؟ الحاجة اللي سرقها بالآلاف باعها بفكه، يستاهل اللي يجراله يجيب للناس حاجتهم".
أما البلوجر نبيل أسعد فقال: "دي مش غابة أين القانون؟".
