مكنش فارق معايا هو مين، منقذ طفل أرض اللواء يكشف لـ«فيتو» كواليس اللحظات الحاسمة (فيديو)
“في ثواني شوفت طفل بيقع من الدور التالت، ومفكرتش في أي حاجة غير إني ألحقه”.. بهذه الكلمات وصف أحمد البطل، الشاب الذي ظهر في فيديو أثناء محاولته إنقاذ طفل سقط من الطابق الثالث بأحد العقارات في منطقة أرض اللواء بالجيزة، تفاصيل اللحظات التي عاشها أثناء الواقعة.
وقال أحمد، في تصريحات لـ«فيتو»، إنه فوجئ بسقوط الطفل، ولم يمنحه الموقف فرصة للتفكير، موضحًا: “الموضوع حصل فجأة، أول ما شوفته بيقع اتحركت على طول، مكنش عندي وقت أفكر أنا هعمل إيه أو إيه اللي ممكن يحصل لي”.
وأوضح: “لما شفت الطفل يسقط من الدور التالت، كل اللي جه في دماغي إني لازم أحاول ألحقه قبل ما يوصل للأرض، مفيش وقت للحسابات ولا التفكير في الخطر”.
وأشار إلى أن محاولته لإنقاذ الطفل جاءت بصورة تلقائية، قائلًا: “محستش بنفسي غير وأنا بجري تحته، كنت شايف قدامي طفل ممكن يتعرض للخطر، فكان لازم أتحرك”.
وعن هوية الطفل، أوضح أحمد: “ماكنش فارق معايا هو منين ولا مين أهله، أنا وقتها شوفت طفل محتاج حد يلحقه، وكل تفكيري كان إزاي أنقذ حياته”.
وتابع: “أنا حتى مكنتش بفكر في نفسي ولا في الإصابة اللي ممكن تحصل لي، كل اللي كان شاغلني إني أوصل له قبل ما يخبط في الأرض”.
وأنهى حديثه: “الحمد لله إني كنت موجود في المكان والوقت ده، وربنا قدرني إني أحاول أنقذ الطفل، وربنا يحفظه ويبعد عنه كل شر”.
