افتكرت أمي، نرمين الفقي تكشف كواليس مشهد وفاة نجلها في "أولاد الراعي"

كشفت الفنانة نرمين الفقي تفاصيل تقديمها دور "فايقة" في مسلسل أولاد الراعي والذي عرض في الموسم الرمضاني المنصرم، حيث تُقدم شخصية مختلفة تمامًا عما قدمته من قبل، وتؤدي الشر لأول مرة.

وقالت نرمين الفقي خلال لقائها في برنامج كلمة أخيرة تقديم الإعلامي أحمد سالم على قناة ON، إن المنتج ريمون مقار هو من أقنعها بتقديم هذا الدور، رغم تخوفها الشديد في البداية، موضحة: "كنت متخوفة جدًا وريمون أقنعني، وكلنا كنا في المكتب خالد الصاوي وأحمد عيد وريمون وقال لهم اقنعوها، وأنا قلت له إني ما عملتش النوعية دي من الأدوار، وقال لي لازم تجددي وتغيري جلدك، ولما بدأت أقرأ حبيت القصة جدًا".

مشاعر الأم

وأضافت نرمين الفقي: “حبيت في البداية مشاعر وأحاسيس الأم اللي أخدت القلوب، ومشهد وفاة ابنها كان متعب جدًا واتصور تقريبًا 3 مرات وكل مرة بعمله بنفس الطريقة إن مكنتش بحاول أكون أحسن لدرجة في المرحلة التالتة بيقوموني مش قادرة أقوم قلت ليهم سبوني أنا هبقى كويسة، فالتدرج في الشخصية والأداء ده في حد ذاته كويس جدًا ومفيش شر مطلق، وليه أسباب أنها ليه عملت كده ومش معنى كده إني مع فايقة في شخصيتها وأكيد مش مقتنعة بده، لكن لازم أكون مقتنعة بالدور اللي بأديه بشخصيتها وروحها وتفكيرها وإيمانها، وده نتاج ابنها اللي توفى بسبب جوزها وجوزها اللي اتجوز عليها".

وأشارت إلى أنها تذكرت وفاة والدتها في مشهد بكائها على وفاة نجلها في المسلسل، وقال: “أنا في اليوم ده كنت عمالة أقول ماما ماما.. الأحداث اللي زي دي بتفكرنا بحاجة تخليك تتأثر وأنا كنت مرتبطة بوالدتي جدًّا”.

وتابعت نرمين الفقي: “الشحصية واضحها هي روحها في أولادها، وعملت كل ده علشان خاطر عيالها، حتى الفلوس في الآخر لما خالد الصاوي بيقول لها أنتِ بتسرقيني.. قالت له أنا لو عاوزة أسرقك كنت خدتها ليَّ مش لابنك".