رئيس التحرير
عصام كامل
Advertisements
Advertisements
Advertisements

نجيب ساويرس يكشف عن رأيه في صفقة رأس الحكمة وتأثيرها على سعر الدولار وموقفه من تدريب حسام حسن للمنتخب ويوجه نصيحة للمصريين

رجل الأعمال المهندس
رجل الأعمال المهندس نجيب ساويرس، فيتو

كشف رجل الأعمال المهندس نجيب ساويرس، عن رأيه في عدد من الملفات الهامة على الساحة الاقتصادية والرياضية، أبرزها إبرام صفقة رأس الحكمة مع الجانب الإماراتي ونظرته في الوضع الاقتصادي مستقبلًا وسعر صرف الدولار، ورأيه في تدريب حسام حسن لمنتخب مصر، وموقفه من نجم ليفربول محمد صلاح.

 

Advertisements

 

تعليق نجيب ساويرس على صفقة رأس الحكمة

صفقة رأس الحكمة، أشاد رجل الأعمال المهندس نجيب ساويرس، بإبرام الحكومة صفقة رأس الحكمة مع الجانب الإماراتي، مؤكدًا: صفقة لها وضع خاص ولا أعتقد أنها ستتكرر، وتعتبر فريدة من نوعها نظرا لتوقيتها مع مرور الدولة بأزمة كبيرة في سعر الصرف وسوق مضطرب في العملة وتوقف المصانع وعدم القدرة على تلبية الاحتياجات من أجل الإنتاج وارتفاع أسعار السلع الغذائية والديون التي تقدر بـ170 مليار دولار وأقساط ديون مستحقة الفترة المقبلة.

 

إنقاذ الدولة وسداد أقساط الديون

وأضاف خلال مداخلة هاتفية ببرنامج "حضرة المواطن" الذي يقدمه الكاتب الصحفي سيد علي بقناة "الحدث اليوم": "واضح إن مكنش عندنا ما يكفى لسداد أقساط الديون، فلما ييجي حد وينقذك في الوقت ده فهذا أمر كويس جدًّا".

 

سعر أرض رأس الحكمة

وأوضح: "أنا راجعت صفقة رأس الحكمة، ولقيت إن سعر الأرض أعلى من اللي احنا اشترينا به كشركة في نفس المنطقة، فلما الجانب الإماراتي يجي يشتري منك الأرض، وبعدين يدخلك معاه شريك بـ35% فهذا أمر لا يصدق.. احنا نفسنا ما بنعطيش الحكومة أكتر من 27%، وبعدين الأهم الرقم هيعمل سيولة دولارية، ويخلينا نقدر نسدد كل اللي علينا ونفتح الاعتمادات للناس اللي شغلها واقف، ونقدر نوصل لسعر الدولار الواقعي ودي مؤشرات مالية".

 

دعم إماراتي لمصر 

وأوضح: "الجانب الإماراتي دفع 24 مليار دولار فقط في الأرض وعلشان يبني الأرض محتاج 3 أو 4 أضعاف الرقم اللي دفعه في الأرض، وبالتالي الفلوس دي كلها هتبقى في مشروعات داخل مصر، واستثمارات قوية لصالح البلد، يعني هما دافعين 24 مليار دولار ثمن الأرض، ومع ذلك أدخلوا الحكومة كشريك بـ35%.. الصفقة دي فيها جانب إنساني وأشقاء بيساعدونا وشعب طول عمره بيحب مصر، وأنا مش بطبل لحد.. الشعب الإماراتي بيعاملوا المصريين هناك بشكل خاص، وطول عمرهم واقفين ورانا وعندهم قناعة إن مصر بوابة الأمة العربية، ولازم يقفوا وراها أيًا كانت المواقف والظروف والمهاترات من اللي فاهم واللي مش فاهم".

ولفت: "كمية المشاريع القبيحة اللي اتعملت في الساحل الشمالي ومساحات الشواطئ اللي باظت.. الإماراتيين لما ييجوا هيخلوا المستوى زي مدينة دبي، لإنهم عندهم فكر متطور ومنظمين، واللي ينزل دبي وأبو ظبي يحلف بيهم، وإحنا كمطورين هنعلي من أسلوبنا ونقلل من أسعارنا، ونخدم الناس أحسن ولما ييجوا يبنوا هيشغلوا كل الشركات المصرية، وهيوفروا فرص عمل كتير، والمرتبات هتعلى وهيخلقوا مدينة جديدة على أعلى مستوى نصف الساحل الشمالي.. وكلنا هنستفيد ومشاريعنا جنبهم أكيد هتستفيد، مينفعش في ظرف زي ده وييجي حد يساعدنا ونيجي نلاقي اللي يفهم وميفهمش يتكلم".

وأشار: "مشاريع الإماراتيين بتبقى مظبوطة، وبيستعينوا بمكاتب عالمية تعمل لهم معمار على أحدث ما توصل إليه العلم، وبيعملوا دراسات جدوى على أعلى مستوى، وبيحافظوا على البيئة وهيعملوا مطار دولي في منطقة مفيهاش مطارات للسياحة العالمية، وبيعملوا مدن ذكية وبيطوروا أي منطقة بشكل كبير".

وأكمل: "فيه ناس يقولوا لك هياخدوا أرضنا.. ده كلام مينفعش يتقال.. يعني هياخدوها ويرجعوا بيها على دبي ولا أبو ظبي يعني؟!".

صفقة رأس الحكمة وسعر الدولار 

وعلق رجل الأعمال المهندس نجيب ساويرس، على ما يتردد ويثار بشأن تأثير الإعلان عن صفقة رأس الحكمة على تراجع سعر الدولار بالسوق الموازية بشكل كبير وانخفاض أسعار الذهب، قائلا: "كل الكلام ده هجايص ومش صحيح، الفلوس مجتش لسة، الدولار هينخفض سعره الحقيقي أول لما الـ 12 مليار دولار يوصلوا".

 

متى ينخفض الدولار؟

وتابع: "محافظ البنك المركزي لما يبتدي يفك إيده شوية على الاعتمادات المتأخرة والبنوك أيضا، فالناس ما تضطرش تنزل تدور على الدولار بالسوق السوداء، وقتها الدولار هينزل فعليا".

 

انفراجة في الاقتصاد

وتابع: "يجب أن يكون سعر الدولار محددًا وفق العرض والطلب، ودخول 24 مليار دولار للبنك المركزي هيعملوا انفراجة 3 أو 4 سنوات". 

 

قوة نجيب ساويرس

وتابع: "ربنا بيبعت وربنا بياخد إيه المشكلة، وأحلف إني أنا عمري ما الفلوس تقدر تأثر فيا ولا في قراراتي ولا معتقداتي ولا في اللي بقوله".

 

دفاع نجيب ساويرس عن محمد صلاح

ودافع رجل الأعمال المهندس نجيب ساويرس، عن نجم منتخب مصر ونادي ليفربول الإنجليزي، بعد حملة الهجوم عليه مؤخرا ومزاعم ادعائه الإصابة.

 

النزعة الشريرة في المصريين 

وقال "ساويرس" خلال مداخلة هاتفية ببرنامج "حضرة المواطن" الذي يقدمه الكاتب الصحفي سيد علي بقناة "الحدث اليوم": "أيام الفراعنة كان كل لما يجي فرعون يروح خابط رأس الفرعون اللي قبله وحاطط صورته وفيه فرعون مزور إنه هو اللي كسب معركة الهكسوس، فيه نزعة شريرة موجودة إن إزاي الجدع محمد صلاح ده نجح وطلع في ليفربول وبياخد 20 مليون إسترليني والراجل طول النهار بيبني جامع في قريته ويتبرع لفلسطين وبيعمل أعمال خير كتير".

 

وطنية محمد صلاح

ولفت: "أنا أعرف محمد صلاح شخصيًّا، وكان بيلعب في نادي روما لما أنا كنت عندي شركة في إيطاليا، وكنت بحط إعلان عنها على تي شيرتات فريقه علشانه، الولد ده وطني من الدرجة الأولى بس يحلوا عنه ويبطلوا يبهدلوا فيه، زي لما حطوا صورته على مصر للطيران من غير ما ياخدوا إذنه وهو موقع عقود مع ناس ومينفعش يعملوا كده وقعدوا يهاجموه علشان مش راضي بالفوضى اللي عملوها، أنا كمان بيحصلي كده بس ولا بلتفت وبنبسط أوي إن فيه ناس متغاظة وأنا برد على اللي بيشتم واللي بيشتم بعمله بلوك".

رأي ساويرس في تدريب حسام حسن للمنتخب

وعن اختيار حسام حسن وشقيقه إبراهيم لقيادة منتخب مصر، علق نجيب ساويرس: "مع احترامي ليهم وأنا بحبهم أوي وشخصيتهم وطريقتهم، بس أنا مش مع قرار اختيارهم لتولي القيادة الفنية، بس المنظومة الكروية أصلا بايظة بقالها 20 أو 30 سنة وتدخلات الدولة كمان وده المفترض يبقى موضوع شعبي وشبابي بس، ومش هتتصلح بالشكل ده، مش قصة مدرب بس".

وكشف رجل الأعمال المهندس نجيب ساويرس، عن نصيحته للمواطنين ورأيه في شراء أو بيع الذهب في الفترة الحالية.
 

وقال نجيب ساويرس: "أنا رأيي واضح لو حد ثروته مثلا 100 جنيه، يخلي معاه 25 جنيه كاش علشان الزنقة، و25 جنيه يشتري عقار علشان الزمن وفيه أمان للمستقبل وثمنه بيزيد، و25 جنيه لشراء الذهب، و25 الاستثمار في أرض زراعية أو شركة زراعية مع ارتفاع أسعار الأكل واللي عنده فدان بيزرعه بيكسب منه كويس".

 

قصة عن أراضي ساويرس في سوهاج

ولفت نجيب ساويرس: "أنا عائلتي كان عندها فدادين في سوهاج وباعتها بـ 50 و100 جنيه، تروح تشتري فدان دلوقتي بـ5 ملايين جنيه، لو كان خلوا الأرض كلها كانت فرقت، بس أبويا مكنش بيحب الزراعة وباع الأرض كلها وكان بيقولي الأرض لمن يزرعها، مع إن ده كان شعار عبد الناصر وهو مكنش بيحبه".

 

ونقدم لكم من خلال موقع (فيتو)، تغطية ورصدًا مستمرًّا على مدار الـ 24 ساعة لـ أسعار الذهب، أسعار اللحوم ، أسعار الدولار ، أسعار اليورو ، أسعار العملات ، أخبار الرياضة ، أخبار مصر، أخبار اقتصاد ، أخبار المحافظات ، أخبار السياسة، أخبار الحوادث ، ويقوم فريقنا بمتابعة حصرية لجميع الدوريات العالمية مثل الدوري الإنجليزي ، الدوري الإيطالي ، الدوري المصري، دوري أبطال أوروبا ، دوري أبطال أفريقيا ، دوري أبطال آسيا ، والأحداث الهامة و السياسة الخارجية والداخلية بالإضافة للنقل الحصري لـ أخبار الفن والعديد من الأنشطة الثقافية والأدبية.

Advertisements
الجريدة الرسمية