السيسي: نحلم بتوفير 25 مليار دولار من فاتورة الاستيراد لإنهاء الأزمة الاقتصادية بأسرع وقت
مؤتمر حكاية وطن، قال الرئيس عبد الفتاح السيسي: "لما اتكلمنا إن عايزين تكون إيرادتنا تساوي مصروفاتنا كان جزء كبير منها الاهتمام بالصناعة، لكن هل يا ترى الدولة وبنيتها التحتية كانت جاهزة لكدا ولا لأ، زي مثلًا قطاع الكهرباء في 2014 ما كانش جاهز لانطلاقة التنمية الصناعية، وعلشان كدا اهتمينا بالبنية التحتية للكهرباء لأن التنمية الصناعية هي الأمل بالنسبة لنا".
توفير فاتورة الاستيراد
وأضاف خلال مؤتمر حكاية وطن: "احنا ممكن نقدم حوافز جديدة للقطاع الخاص المصري والأجنبي علشان نوفر 25 مليار دولار من فاتورة الاستيراد وتقليل الضغط على الدولار، الإنفاق بالدولار عبء علي وأنا مثلًا بجيب مشتقات بترولية بالدولار ببيعها بالجنيه ومواد غذائية وخامات بجيبها بالدولار وأبيعها بالجنيه وعلشان كده لازم إيراداتي من الدولار تساوي إنفاقي من الدولار أو تزيد، حلمنا وبقول لكل المستثمرين المصريين تعالوا عندنا فرص وبنقدم حوافز تشجع على النجاح وهنقدم تسهيلات لمن يقومون بالتوسع في الصناعات اللي احنا عايزينها زي دعم الضرائب وتسهيلات دعم الصادرات علشان نزود الناتج المحلي وزيادة التشغيل وأيضًا توفير عملة صعبة، عايزين نقنع المستثمرين المصريين والأجانب للعمل ضمن قائمة المشروعات المطروحة والمتوفرة من قبل وزارة الصناعة والتجارة والتي تحمل حوافز وحزم تشجيعية".
انتهاء الأزمة الاقتصادية
وتابع: "احنا كدولة ومستثمرين ومواطنين ورجال أعمال عايزين ننهي الأزمة الاقتصادية في أسرع وقت ممكن واحنا محتاجين وآن الأوان إننا نتحرك بفاعلية لإقناع رجال الأعمال علشان يشتغلوا معانا ونقدر نوفر الـ25 مليار دولار، واحنا دلوقتِ بنخصص أراضي للمستثمرين، وأنشأنا 17 مجمع صناعي وقادرين ننشئ 30 مجمع صناعي جديد لو فيه طلب ودي رخصها هتكون جاهزة لأي مستثمر".
دعم البنية المناسبة للمستثمرين
وتابع: "نعد البنية المناسبة اللي تنجح أي مشروع لأي مستثمر، واحنا ما اتأخرناش في إنشاء المجمعات الصناعية".
نقدم لكم من خلال موقع (فيتو) ، تغطية ورصد مستمر علي مدار الـ 24 ساعة لـ أسعار الذهب، أسعار اللحوم ، أسعار الدولار ، أسعار اليورو ، أسعار العملات ، أخبار الرياضة ، أخبار مصر، أخبار اقتصاد ، أخبار المحافظات ، أخبار السياسة، أخبار الحوادث ، ويقوم فريقنا بمتابعة حصرية لجميع الدوريات العالمية مثل الدوري الإنجليزي ، الدوري الإيطالي ، الدوري المصري، دوري أبطال أوروبا ، دوري أبطال أفريقيا ، دوري أبطال آسيا ، والأحداث الهامة و السياسة الخارجية والداخلية بالإضافة للنقل الحصري لـ أخبار الفن والعديد من الأنشطة الثقافية والأدبية.
