مي كساب: أوكا أغلى ما في حياتي وعايشة مرحلة الطظ (فيديو)

قالت الفنانة مي كساب: "أوكا زوجي صاحب مدرسة المهرجانات ومش صح إنه اختفى، وعنده فكر ومخلص وهو طول الوقت بيفكر إزاي يطور ودي مشكلة الصانع، والمزيكا شغلته الأولى والأخيرة وهو عايز ياخد المهرجانات في حتة تانية خالص، وده اللى بيخليه متأخر وبيعمل تجارب لحد لما يوصل لحاجة قوية وبيحضر لألبوم كامل". 

مي كساب ترد على أنباء انفصالها عن أوكا

وأكدت خلال لقائها ببرنامج "حبر سري" الذي تقدمه الإعلامية أسما إبراهيم بقناة "القاهرة والناس":"محصلش أبدا إني انفصلت عن زوجي أوكا، أنا وهو أول كام سنة في الجواز زي أي اتنين مكناش لاقيين الطريقة اللى نعرف نتفاهم بيها مع بعض، وأنا أقر وأعترف إني كنت الغلطانة الوحيدة في القصة دي لإني كنت مستعجلة أوي علي كل حاجة تحصل بسرعة وده مش صح".
 

فترة معاناة مي كساب من الكورونا

وأضافت مي كساب: "لما جالي كورونا قعدت 28 يوم في الأوضة لوحدي، وده خلاني أشوف شريط حياتي كله ، وبجد أنا استحملت حاجات كتيرة أوي خاصة لما اتجوزت محمد أوكا وعلاقتنا مرت بحاجات كتيرة لحد لما استقرت، ولما مسحت الصور كنت بمسحها علشان مش عايزة اي صورة تفكرني بلحظة عشتها في الوقت ده، والناس فسرت اني مسحت الصور علي السوشيال ميديا وده معناه انفصالي عن أوكا وده مش صح".
 

أزمة مي كساب مع أوكا

وتابعت:"كان عندي أزمتين في حياتي الأولى وفاة أمي، والثانية لما أوكا حصلت له المشكلة بتاعته(وكانت السلطات ألقت القبض علي أوكا بتهمة التهرب من التجنيد في عام2017)، ووقتها كنت حاسة اني مخطوفة في الوقت لحد لما قعدت في الأوضة لوحدي فشريط حياتي مر قدامي فلقيت إن الغلطان الوحيد في رحلتي بالحياة هو أنا فخرجت من الأوضة واحدة تانية تماما معنديش استعداد ادخل في صراعات مع حد ولا أخسر تاني ومش عايزة حاجة من الدنيا غير إني ابقى كويسة وأبويا كويس وجوزي كويس وولادي كويسين وقريبين واصحابي المقربين كويسين".
 

وأكدت:"في أزمة أوكا مفيش أي بني اَدم قاللي اتطلقي او اخلعيه بالعكس كل الناس كان داعمين ليا، ويبقى شخص ناقص اللى يقول لست تتخلى عن جوزها وهو في محنة".
 

خطأ مي كساب مع أوكا

ولفتت:"غلطانة جدا علي تأخير قرار الجواز وبقعد ادعي ربنا طول الوقت علشان خاطر ولادي لما يبقوا محتاجين ليا يلاقوني".
 

وأضافت:"أوكا أغلي شخص في حياتي وهو نقطة ضعفي الوحيدة، ودلوقتي مبقتش بنزعج من تعليقات بعض الناس عن فارق السن بينا، في الأول كنت بحس سخافة وبزعل من التعليقات المسيئة لكن دلوقتي بقيت متبلدة المشاعر وبقى عندي أولويات في الزعل مش أي حد بزعل منه، وعايشة حاليا مرحلة الطظ وهي مرحلة حلوة أوي الدنيا تنقلب وأنا هادية ووصلت للمرحلة دي بعد الأربعين".
 

رشاقة مي كساب تخطف أنظار الجمهور في برنامج حبر سري (صور)

مي كساب: جعفر العمدة فاق التوقعات

دعم أوكا لزوجته مي كساب

وأكدت:"أوكا بيحب يشوفني ناجحة واكتر حد بيشجعني علي الشغل والنجاح، وعمر ما حصل بينا عداء، وفي كل مرحلة أكون حاسة باليأس فيها يقولي لازم تكوني قوية ومتستسلميش لليأس ولا الإحباط ولازم تتحدي كل صعب". 

ونقدم لكم من خلال موقع (فيتو)، تغطية ورصدا مستمرا على مدار الـ 24 ساعة لـ أسعار الذهب، أسعار اللحوم ، أسعار الدولار ، أسعار اليورو ، أسعار العملات ، أخبار الرياضة ، أخبار مصر، أخبار اقتصاد ، أخبار المحافظات ، أخبار السياسة، ويقوم فريقنا بمتابعة حصرية لجميع الدوريات العالمية مثل الدوري الإنجليزي ، الدوري الإيطالي ، الدوري المصري، دوري أبطال أوروبا ، دوري أبطال أفريقيا ، دوري أبطال آسيا ، والأحداث الهامة و السياسية.