فاروق فلوكس يكشف لأول مرة تفاصيل انضمامه إلى الإخوان وسر ابتعاده عن الجماعة (فيديو)
كشف الفنان فاروق فلوكس، كواليس انضمامه إلى جماعة الإخوان خلال فترة طفولته، وسر ابتعاده عن الجماعة الإرهابية.
بداية انضمام فاروق فلوكس إلى الإخوان
وأوضح فاروق فلوكس خلال لقائه ببرنامج"الستات" الذي تقدمه سهير جودة ومفيدة شيحة بقناة "النهار":"أنا كنت ساكن في ميدان عابدين وعمري حوالي 6 سنين، وبيتنا كان مواجه لبلكونة قصر عابدين، فكان الإخوان بيمشوا قدامنا وهما لابسين لبس كشافة ومعاهم الطرومبيطة فعجبني الشكل ده
ةقلت أنا عايز انضم ليهم، وعرفت أن ليهم مقر في بيت قديم بشارع محمد محمود، وقلت لوالدي أنا عايز انضم للجماعة علشان أمشي في الطابور ده فقال لي اللى أنت عايزه اعمله واللى أنت شايفه صح اعمله واللى تلاقيه خطأ أو خطر تعالى قوللي، وبالفعل انضميت ليهم".
كواليس عمل الإخوان
وتابع فاروق فلوكس:"لما انضميت لجماعة الإخوان كانوا بيحفظونا قرآن فقلت كويس إحنا كنا في الكتاب بنحفظ القرآن، وبعدين قالولنا هنروح نحضر خطبة للشيخ حسن البنا في مقر الدرب الأحمر اللى هو قسم الدرب الأحمر دلوقتي،
وأنا كنت بمشي وراهم علشان لبس الكشافة والطرومبيطة، وكان حسن البنا طويل ولابس بالطو وصوته جهوري وكان بيشرح حاجات أنا مش ملم بيها، بس فيه آيات قراَنية وأنا رجل بحب الدين بتاعي
ومرة لقيتهم واخدنا وبينزلونا للبدروم ولقيت البدروم كله رمل وفيه سلك شائك وادونا عصاية بتاعت المكنسة وقالوا لنا ازحفوا علي الرمل وحاولوا تعدوا من تحت السلك الشائك، وانا مبحبش حد يفرض عليا حاجة من صغري وأنا مش عدواني أنا رايح علشان الطرومبيطة،
ولكن علي مضض عملتها وحتى السلك الشائك شد في هدومي، وبعدين خرجنا من التدريب ولبسي كله رمل، فرجعت لوالدي قلت له مش راجع المكان ده تاني ، وفعلا مروحتش تاني وبعتوا لي فقلت لهم أنا تعبان صحيا مش هروح تاني".
سر ابتعاد فاروق فلوكس عن الإخوان
وأضاف:"في الثانوي قابلت واحد إخواني لما كان اَذان الظهر يشدني ويقولي يلا يا أخ علشان تصلى، فكنت أقوله انت مالك ومالي انت دخلك إيه وأنا مش جاي، وعرفت إن الشاب ده منضم للإخوان لما كان فيه مظاهرات وأنا كنت في مدرسة الابراهيمية فكان البوليس يجي يضرب علينا قنابل مسيلة للدموع
فالاقي الإخواني ده يروح جايب جردل فيه رمل ويستقبل القنبلة دي، مين علمه فعرفت انه مدرب، فأنا مكنتش احب شغلهم ولا العنف".
نقدم لكم من خلال موقع (فيتو)، تغطية ورصدا مستمرا على مدار الـ 24 ساعة لـ أسعار الذهب، أسعار اللحوم ، أسعار الدولار ، أسعار اليورو ، أسعار العملات ، أخبار الرياضة ، أخبار مصر، أخبار اقتصاد ، أخبار المحافظات ، أخبار السياسة، أخبار الحوادث ، ويقوم فريقنا بمتابعة حصرية لجميع الدوريات العالمية مثل الدوري الإنجليزي ، الدوري الإيطالي ، الدوري المصري، دوري أبطال أوروبا ، دوري أبطال أفريقيا ، دوري أبطال آسيا ، والأحداث الهامة و السياسة الخارجية والداخلية بالإضافة للنقل الحصري لـ أخبار الفن والعديد من الأنشطة الثقافية والأدبية.
