أسباب ارتفاع ضغط دم الحامل وطرق الوقاية
تتساءل الكثيرات من النساء عن معنى "ضغط دم الحامل"، أو "ارتفاع ضغط الدم أثناء الحمل"، وكيفية التعامل مع حالات الضغط المرتفع.
الدكتورة نهى عبد العظيم، استشاري أمراض النساء والتوليد بمستشفيات جامعة عين شمس، تجيب عن هذه التساؤلات، قائلة: "ممكن المريضة الحامل تيجي ضغطها عالي أصلا، وده في شهور الحمل الأولى.. وده بيستلزم تغيير علاج الضغط اللي هي ماشية عليه، بحيث تأخذ أدوية معينة آمنة مع الحمل؛ لأن مش كل أدوية الضغط بتكون آمنة مع الحمل".
"systolic number"
وتضيف د. نهى: "إيه بقى ضغط الحمل"؟!، موضحة: "الحامل بيكون ضغطها طبيعي في بداية الحمل، وبيبتدي يرتفع مع الحمل، وبيرتفع قد إيه لما بنقيس الـ (systolic number).. ده بيكون الرقم اللي بيتكتب فوق وأول رقم بيتقاس وده في الطبيعي بيكون من 110 فما فوق لحد مثلا 140.. من 140 فيما فوق بيعتبر ضغط عالي، ولكن مش من أول مرة المريضة بتيجي حوالي 3 مرات بتقيس كذا مرة، بيكون في الـ 3 مرات مرتفع، ساعتها بنبدأ علاج للضغط المرتفع".
نصائح قبل قياس ضغط الدم
وتؤكد استشاري النساء والتوليد: "طبعا المريضة بتكون خلال الـ 3 مرات قياس دول قاعدة مستريحة، دخلت العيادة قعدت فترة قبل قياس الضغط، بنقيس الضغط والمريضة قاعدة مش وهي مستلقية على ضهرها، بتكون نايمة كويس علشان نقدر نحكم إذا كان الضغط مرتفع.. بعد لما بنوصف العلاج الدوائي لازم المريضة تتابع قياس الضغط برضه، علشان نتأكد إذا فعلا الجرعات دي نجحت في ضبط الضغط، وأنه نزل لأقل من 140/90" .
وتقول د. نهى عبد العظيم: "بنضيف لعلاج الضغط أسبرين علشان نمنع مضاعفات ارتفاع الضغط اللي هو ممكن يدخل المريضة في حالة تسمم الحمل".
3 درجات لتسمم الحمل
وعن "تسمم الحمل"، توضح: "تسمم الحمل يعني ارتفاع ضغط الدم فوق 160/110 أو ظهور زلال في البول، ودرجات تسمم الحمل هي 3 درجات، ولازم المريضة تتابع كويس قياس الضغط علشان منوصلش لمرحلة تسمم الحمل، لأنها ممكن لو وصلت للمرحلة دي تحتاج حجز في العناية المركزة؛ لأن كل أعضاء الجسم بتشتكي.. بيحصل مشكلة تورم في المخ وارتشاح حول الرئة، ومشكلة في الكبد، توقف في الكلى.. كمان ممكن يحصل لها توقف في أداء وظائف أعضاء الجسم.. عموما بيحصل مشاكل كتيرة جدا في الجسم بسبب التسمم وده اللي بنحاول نتفاداه".
تعريف وأسباب ارتفاع ضغط الدم أثناء الحمل
وعن تعريف وأسباب ارتفاع ضغط الدم أثناء الحمل، تضيف: "ارتفاع ضغط الدم مع الحمل هو حاجة فسيولوجية بتحصل بسبب الحمل نفسه، غير معلوم السبب حتى الآن، ولكن كلها نظريات، زي إن احنا لما بندي مثلا الأسبرين بيقلل وصول تسمم الحمل، بندي الأوميجا 3 أيضًا".. "الجديد بقى إن احنا لما بننتظم على الكالسيوم وفيتامين "د"، ده بيقلل من مضاعفات ارتفاع الضغط لكن مش بيمنع الارتفاع نفسه".. "احنا هدفنا إن الطفل يتولد بسلام بعد كدة بيبتدي الضغط يرجع بصورة طبيعية في غالبية الحالات لمعدله الطبيعي في خلال فترة من أسبوعين لـ 3 أسابيع".
وتختتم د. نهى عبد العظيم: "وطبعا المريضة بتقلل الأملاح وبتقلل المخللات والتوتر أو الضغوطات النفسية، وتمنع التدخين، وتنام كويس على الأقل 6 ساعات مساء، وساعتين بالنهار، وتمنع الكحوليات لو كانت بتتناولها، كل ده علشان يفضل ضغط الدم منتظم، وميحصلش مضاعفات لا قدر الله".
نقدم لكم من خلال موقع "فيتو"، تغطية ورصدا مستمرا على مدار الـ 24 ساعة لـ أسعار الذهب، أسعار اللحوم، أسعار الدولار، أسعار اليورو، أسعار العملات، أخبار الرياضة، أخبار مصر، أخبار الاقتصاد، أخبار المحافظات ، أخبار السياسة، ويقوم فريقنا بمتابعة حصرية لجميع الدوريات العالمية مثل: الدوري الإنجليزي، الدوري الإيطالي، الدوري المصري، دوري أبطال أوروبا، دوري أبطال أفريقيا، دوري أبطال آسيا، والأحداث الهامة والسياسة الخارجية والداخلية، بالإضافة للنقل الحصري لـ أخبار الفن والعديد من الأنشطة الثقافية والأدبية.
