غراب البين يكتب: فيديوهات الأكل المستفزة

بعد يوم طويل من اللف والدوران والمرازيه فى خلق الله قررت أريح جتتى ساعتين.. وقفت على أحد جزوع الشجرة اللى فى وسط البلد.. جلست وانكمشت بين أجنحتى ولسه هروح فى النوم وإذا بأصوات طرقعة الطاولة والدومينو تأتينى من المقهى أسفل الشجرة

نظرت لأسفل فوجدت أن الحاج منصور أبو شريفة هو من خبط الطاولة ليغلقها متضجرًا ويدخل فى حوار مع زملائه على المنضدة قائلا: هى الناس اللى بتنشر فيديوهات الأكل والولائم دى ماعندهاش دم يعنى ولا إيه.. دا انا اتفرجت على فيديو النهاردة لتحدى أكل بطة وفرختين وريقى بيجرى من الصبح والبيت مافيهوش غير فول وجبنه وحلاوه

فيرد عليه الأستاذ ممدوح ساخرًا: دى ناس مش حاسه باللى احنا فيه.. ومعظمهم من الشباب اللى مش حاسس بمعاناة الآخرين وعايز يجمع فلوس من المشاهدات وخلاص

الباشمهندس حمدى ضاحكًا: وانتم متغاظين ليه.. عادى يعنى.. أنا واحد من الناس بحب اتفرج على فيديوهات الاكل دى وكمان بفكر أعمل فيديوهات أنا ومراتى وحماتى ونعمل تحدى على أكل فرختين أو بطايتين أو حلة محشى و2 كيلو لحمه كندوز وصفحتنا تكبر وتجيب إعلانات عادى يعنى

وهنا وقفت على قدمى وفردت ريشى وأخذت أنعق بأعلى صوتى "قاق قاق".. فراح رواد المقهى جميعا يهشوننى ويقولون لى غور من هنا يا غراب البين جبتلنا النكد والفقر.. فهربت مسرعًا قبل أن يحدفونى بالطوب ولسان حالى يقول: بقى أنا اللى جايب لكم النكد ولا أنتم اللى جايبينه لبعضكم البعض؟

يعنى فى ظل الظروف العالمية دى وشكاوى الناس من غلاء المعيشة يأتى من يتباهى بتناوله ولائم الأكل وينشر فيديوهاته على الفيس بوك دون مراعاة لمشاعر المتقشفين رغم أنفهم.. ألم يدعو هذا التصرف للنكد والغم على بعضهم؟

ياريت تراعوا مشاعر الآخرين من آكلى الأجنحة وأرجل الفراخ.. فلتأكل ما تحب من بط ومحشى ولحوم.. لكن لا داعى لنشر ذلك فى الفيديوهات

فلتصنع فيديوهات كما تحب وانشرها للناس.. لكن ابتعد عن كل ما هو مستفذ للغالبية من أبناء وطنك خاصة فى هذا التوقيت الصعب

ياخى جاتها ستين ألف نيلة اللى عايزة تخلف بنى آدمين زيكم مش حاسين بظروف بعض!