محمد حماقي: تمنيت اللعب للأهلي وأغنية حاجة مستخبية جابتلي جلطة، أحلام سبب بكائي في برنامج ذا فويس

محمد حماقي ، كشف المطرب محمد حماقي العديد من المفاجآت عن حياته الخاصة وبداياته الفنية، وسر عشقه لكرة القدم وأسباب عدم استكمال مشواره الرياضي، وبداياته الفنية مع عمرو دياب ومصطفى قمر وهشام عباس، وما قاله كلاهما عنه".

ويوضح  محمد حماقي، فى الجزء الثاني من لقائه ببرنامج "صاحبة السعادة"، تقديم الفنانة إسعاد يونس المذاع على فضائية "dmc"، أسباب  انفصاله عن زوجته وعدم الإعلان عن ذلك لوسائل الإعلام، ومفاجآت كثيرة ترصدها "فيتو"، فى هذا التقرير.

قال الفنان محمد حماقي: "أول التسعينات كنت مشهور في الوسط من غير ما أغني، وبدلا من أن أكون مدرس موسيقى انطلقت لعالم الغناء في 1996 مع طارق مدكور، واقتنع بيا جدا لما سمعني وقال لى خليك معايا بقى لحد لما نجهزك، وكنت عملت باند مع أصحابي في الكلية ونغني ببلاش في أي رحلة أو أي فرح تبع أي واحد اصحابي".

إسعاد يونس تعلن إنتاجها فيلما لمحمد حماقي والفنان يكشف شرط الموافقة  اقرأ هنا

استوديو طارق مدكور وحفلات مصطفى قمر

وتابع: “عشت مع طارق مدكور في الأستوديو، وهو بيعمل أغاني لعمرو دياب ومصطفى قمر وهشام عباس، وكل أغنية يعملها أخش اعملها واسجلها وأعيش.. وفي الوقت ده بقيت انا ومصطفى قمر صحاب في ألبوم ”لمن يهمه الأمر"، وبقينا اصحاب وكان عنده حفلة في مهرجان بالأردن، وقال لى ممكن تطلع معايا الحفلة دي؟ فقلت له ماشي بس انا معنديش باسبور، والمهم عملته، وطلعت حضرت معاه وكنت مبهور بالجمهور الحفلة، وبعدين سرحت علي المسرح لحد لما قربت من الجمهور والمنظر كان رهيب فواحد من الفرقة قال لى انت في يوم من الأيام هتيجي وهتبقى نجم".

بقيت عامل زي الأسفنجة

وأكمل محمد حماقي: "مصطفى قمر بعد الحفلة قال لى خليك معايا وبقيت عامل زي الأسفنجة من اللايف والتدريب، وكانت تجربة حلوة اتعلمت منها بدون تأثير مباشر، وبقيت اتعلم من الصح والغلط بدون ما أتعور، ودي مرحلة أنا فخور بيها لأنها ورتني ازاي اتعامل مع الفرقة والتكنيك الصح في الغناء وازاي اتعامل مع الجمهور".
 

صداقة عمرو دياب

وأضاف: "هشام عباس يقول لي صوتك حلو ونبقى أصحاب، وعمرو دياب يقول لي نبقى أصحاب ومصطفى قمر كذلك، فاستفدت جدا من كل واحد".
 

انتشار محمد حماقي

وتابع محمد حماقي: "أنا من الباند للأستوديو للايف مع مصطفى قمر وحفلات قاعات القوات المسلحة، والألبوم الأول ليا قعدت أحضر فيه 3 سنين من 2000 ونزل 2003، عمري ما يئست ولكن تعبت وزعقت.

أمنية حماقي التي لم تتحقق 

وأشار:"كان ليا زمان رغبة العب كورة في الأهلي والبس 12 زي طاهر أبو زيد اللى كنت بحبه وبعدين مجتش الفرصة وده اللى حصلي مع المزيكا ولكن تمسكت بالفرصة، وكان فيه مراحل إحباط بايخة".

زوجة محمد حماقي

أكد الفنان محمد حماقي، حقيقة ارتباط أغنية “ما بلاش” بانفصاله عن زوجته نهلة قبل عودته اليها مجددًا، مؤكدًا:"الأغنية مكنش ليها أي علاقي بانفصالي".

وأضاف:"انفصلت عن زوجتي سنتين ومكناش لسه أعلنا الرجوع قبل تصوير كليب الأغنية، رجعنا أنا ونهلة في شهر رمضان بعد الأغنية".

ارتباط أغنية ما بلاش مع والد محمد حماقي

وأكد:"أغنية ما بلاش، لها علاقة برحيل والدي عني، الأغنية ليها حكاية مع أبويا الله يرحمه وملهاش علاقة بنهلة مراتي".

وأشار:"آخر يوم مع ابويا كان فرح بنت خالي وهو كان مزاجه حلو ومنطلق وعمال يسلم على كل الناس ويرحب بكل الناس ومنطلق وانا غنيت ويومها كانت معدتي وجعاني وبشتكي وبطني وجعاني ومش مبسوط وانا خارج من القاعة لقيته بيحط ايده في جيب البدلة بتاعته وطلع لي ملبس وقاللى خد حلي بوقك علي الغناء الحلو اللى غنيته ده وقاللى يلا انا همشي بقى مع السلامة وسلم عليا ومشي والكلام ده كان بالليل ولما روحت لقيته بيكلمني وسألني روحت ولا لأ ومحتاج حاجة ولا لأ،  شكرته تاني يوم 9 الصبح جالي تليفون أنه توفى فكانت صدمة كبيرة جدا ومرحلة وحشة".
 

لحن تخليد ذكري رحيل والد محمد حماقي

ولفت:"بعد وفاة أبويا كان عندي لحن كنت واخده من تامر علي وهو كاتب كلمتين ما بلاش تغيب عنا تاني ما بلاش يا سايب أراضينا، فأنا حبيت الأغنية واخدتها منه، وقعدت فترة قاعد مع امي ومبنزلش وامير طعيمة يوميا كان يكلمني وبيحاول يخرجني لغاية لما جالي في يوم تحت البيت وقاللى مش هامشي الا لما تنزل معايا فقعد يقولي كلام يخرجني من حالتي الوحشة فقلت له انا عندي غنوة عايزك تكملها اللي هي "ما بلاش" والكلام اللى اتكتب في الأغنية هو فعلا اللى حصل مع رحيل أبويا، وأمير طعيمة كتب اللقاء الأخيرة بيني وبين أبويا في الأغنية والحقيقة انه وصل للناس زي ما انا عايز"

قصة اغنية ما بلاش

واشار:"المخرج ميدو شعبان قاللى حاسس ان ما بلاش مش اغنية ولكن ترتيلة وفيها حاجة غريبة هي دي بتاعت ايه فحكيت له حكايتها، وقاللى فعلا دي حالة وانت كده وصلت لي القصة بتاعتها".

وتابع:"لما صورت الأغنية عملتها بالمقلوب كأب لبنت بلعب معاها واهزر معاها الصبح وامشي، وباختفي ويفضل عندها احساس اني معاها طول الوقت".

حقيقة اغنية ما بلاش

وأكد:"حالة اغنية ما بلاش مكنتش مصطنعة ولكنها كانت حقيقية"، مؤكدا: "السر وراء ترجمة الأغاني بتاعتي يكمن في الفكرة اللي انا دايما براهن عليها ان المزيكا لازم كل الناس تفهمها".

سر نجاح وترجمة أغاني محمد حماقي

وتابع خلال الجزء الثاني من لقائه مع الإعلامية إسعاد يونس ببرنامج “صاحبة السعادة” المذاع علي قناة “دي إم سي”: حريص في الأغاني بتاعتي إني أحط المحتوي الثقافي بتاعنا المصري جوة قالب كل الناس تفهمه على مستوى العالم ومتبقاش مزيكا ضيقة، لإني مؤمن إن ثقافتنا ومزيكتنا ممكن كل الناس تفهمها لإننا بنقدم جودة كويسة على مستوى الصوت والمزيكا واللحن، وبقت الأغاني تتحب وبقوا يغيروا الكلام وعندي أغاني اترجمت جوة وبرة، واللي اترجمت جوة أغنية حاجات مستخبية اللى هي بنت الجيران عملت مشاكل كبيرة".

قصة غريبة وراء أغنية حاجة مستخبية

وأشار محمد حماقي: "أصل الأغنية فيه جوة قلبي حاجة مستخبية، قصة غريبة؛ الأزمة الصحية اللى اتعرضت لها وهي جلطة القلب، في وقت من الأوقات حصلت له أزمة صحية.. 2011، كنا في يوم قاعدين شغالين على الأغنية وحسيت إني مش مظبوط وحاجة بتوجعني في صدري وضهري وكتفي، فكنت المفترض أطلع على تومة أشتغل.. وصلت البيت قست الضغط لقيته 160/110 ضغط عالي، وبعدين شربت كركديه الضغط نزل شوية، وبعدين نمت صحيت لقيت الوجع رجع تاني.. نزلنا رُحت المستشفى دخلت عملنا رسم قلب، قال دلوقتي تمشي حالا تروح على مستشفى تاني.. وصلت لقيت الناس واقفة بكرسي علشان ممشيش.. في ثانية فتحوا القسطرة، وعملت القسطرة، والمشكلة اتلحقت في وقت متسيبش أثر يعني".

الأزمة الصحية لمحمد حماقي

وتابع: "المصادفة الغريبة إن الأغنية بتاعت الوعكة الصحية فيه جوة قلبي حاجة مستخبية، وبعدين طلعت عندي جلطة في القلب وبعدها شائعة إني هبطل غناء وبعدين غنيت من قلبي بغني".

قال الفنان محمد حماقي: "لو اتأثرت أنا سهل أعيط مبعرفش أخبي، وممكن ألاقى نفسي في ثانية أعيط"، كاشفا سر بكائه في برنامج "ذا فويس".

سر بكاء محمد حماقي في “ذا فويس”

وأوضح خلال الجزء الثاني من لقائه مع الإعلامية إسعاد يونس ببرنامج “صاحبة السعادة”المذاع على قناة “دي إم سي”: "اللى عيطني في ذا فويس الفنانة أحلام، كان فيه صوت غنا كويس جدا فعجبني الصوت، فلفيت لقيت متسابق مش طبيعي، ولكن قاعد على كرسي متحرك، فرُحت للمتسابقة وقعدت جنبها فاتأثرت جدًّا ولما اخترتني اتأثرت أوي وبكيت وبقيت قاعد على الكرسي مش عايز حد ييجي جنبي فقاعدة جنبي أحلام وحست بيا فببص لقيتها بتقولي أنا حاسة بيك وهي قامت من على الكرسي وجايالي، بكيت جامد وتحاول تطبطب عليا أزيد في البكاء".

مشاعر محمد حماقي مع المواقف المؤثرة

وأشار: "لما بعيط بحس إني عايش وباطمن إن كل حاجة شغالة عندي، والدنيا جمدت أوي والمشاعر في خطر، وعلشان كده طول الوقت محتاجين نحركها ونمرنها، ودايما تحريك المشاعر تمرين ولما نبكي وقت الفرح ووقت الحزن يبقى احنا لسة بخير، إنما لو مشاعرنا غابت يبقى احنا كدة في خطر".