كانت رافعة إيديها للسما.. عميد علوم المنوفية السابق يحكي موقفًا مؤثرًا لطالبة

نشر الدكتور محمد توفيق عميد كلية العلوم بجامعة المنوفية، موقفًا مؤثرًا حدث مع إحدى الطالبات وقت أن كان عميدًا للكلية، لينال المنشور تفاعلًا كبيرًا من قبل المتابعين الذين قاموا بإعادة نشره.

وجاء فى المنشور "أثناء مروري وأنا عميد الكلية  لقيت طالبة خارجة من مسجد الفتيات بتعيط وبتتمتم بدعاء ورافعة إيدها للسما.. سألتها: مالك يابنتي ؟ قالت: عايزة احول من كيمياء نبات لكيمياء ميكرو وطلبي اترفض وصاحباتي بيقولوا: لازم واسطة.. قلتلها طيب تعالي معايا.. جت معايا المكتب جبتلها عصير من التلاجة بنفسي، وطلبت شئون الطلبة جابولي كل طلبات التحويل ووافقت عليها كلها".

ويكمل عميد كلية العلوم السابق " وقلتلها: مبسوطة ؟ أديني أكرمت كل الطلبة علشانك  .. أي حاجة تعوزيها بقا تجيلي والسكرتيرة هتدخلك ع طول.. ضحكت وقالت: لا يا دكتور أنا هبقا آجي أسلم ع حضرتك بس.. لكن لما اعوز حاجة هصلي وأدعي ربنا وزي ما جاب حضرتك لحد عندي علشان تحوللي  هيجيب اللي حاجتي عنده علشان يقضيها".

واختتم توفيق المنشور بشعوره حينها قائلًا " والله عيني دمعت واتمنيت إن أروح لأبوها وأمها أبوس راسهم على تربيتهم الراقية دي".