السيسي: مشروع الرمال السوداء متاح للقطاع الخاص.. اللي عاوز يتفضل

قال الرئيس عبد الفتاح السيسي، إن مشروع الرمال السوداء، ننتظره منذ فترة طويلة.

أضاف السيسي: "انتظرنا المشروع ده فترة كبيرة أوى.. خلال أكثر من 3 سنوات.. ووصول المعدات خلال الفترة الماضية".

وتابع: "أنا بقول الكلام ده للقطاع الخاص والشركات اللى اشتغلت معانا فى هذا المجال زى حسن علام وغيره.. انت عرفت المسار.. ده مسار خد وقت طويل فيه.. المكونات والطرح والكلام اللى بيتعمل علشان وصول المعدات.. ثم 60 % منتجات تتعمل فى مصر والباقى ييجى من الخارج.. لما كنا بنعمل المشروع بتاع الرمال السوداء ده سألت سؤال عن حجم الاحتياطات اللى موجودة هنا تكفى قد ايه وحجم الطلب العالمى عليه قد ايه.. هل فيه فرصة لمشروع و2 و3.. وبقول للقطاع الخاص المشروع ده متاح للقطاع الخاص الدخول فيه اللى عاوز يتفضل.. وده بقوله فى كل مشروع يتم افتتاحه.. الفرصة دى كانت موجودة على مدار 40 و50 سنة".

ويفتتح  الرئيس عبد الفتاح السيسي صباح اليوم الأربعاء، مصنع الرمال السوداء بمدينة البرلس بمحافظة كفر الشيخ.

صرح السفير بسام راضي المتحدث الرسمي باسم رئاسة الجمهورية، بأن مصنع الرمال السوداء بكفر الشيخ هو الأحدث من نوعه على مستوى العالم باستخدام تكنولوجيا التعدين المتطورة.

وأكد أن المصنع يعد إضافة جديدة لسلسلة المشروعات القومية الكبرى التى تهدف الى تعظيم الاستفادة والاستغلال الأمثل لموارد مصر الطبيعية، وتحقيق القيمة المضافة للمعادن المستخلصة من الرمال السوداء، التى تستخدم فى العديد من الصناعات الدقيقة مما يفتح الآفاق لاستثمارات جديدة تدعم الاقتصاد الوطني وعملية التنمية الشاملة.