مرتضى منصور لبطل تشاد: "هنزلكم لوكاندة العتبة.. وهتروحوا الملعب بتوك توك"
توعَّد المستشار مرتضى منصور، رئيس نادي الزمالك، فريقَ إيليكت التشادي بسبب تعنُّته مع القلعة البيضاء ورفضه لعب مباراتي دور الـ64 بدوري أبطال أفريقيا في القاهرة.
رسالة مرتضى منصور لبطل تشاد
وقال مرتضى منصور خلال مداخلة هاتفية ببرنامج "زملكاوي" الذي يقدمه الإعلامي أحمد جمال بقناة “الزمالك”: "بقول لفريق تشاد اللي إنتوا عملتوه معانا غريب ومش مفهوم، وبسبب اللي عملتوه معانا هنزلكم لوكاندة العتبة اللي جنب المطافي وهخليكم تروحوا إستاد المباراة بتوك توك.. أو أقولكم لما تيجوا مصر هتنزلوا في بنسيون فتكات، ولما تحبوا تروحوا الإستاد هنجيبلكم عشر تكاتك تروحوا فيها".
لعب الزمالك في دور الـ64 ببطولة أفريقيا
وتساءل مرتضى منصور، قائلًا: "إزاي اللي واخد بطولة الدوري يلعب دور الـ64 في بطولة أفريقيا وتالت الدوري يلعب من دور الـ32؟! هو مش المفروض تالت الدوري ده يلعب في الكونفدرالية، حاجة غريبة ولخبطة مش مفهومة، زي لما يقولك الـ7 بطولات أكبر من 9 بطولات أفريقيا"- في إشارة منه لمجاملة النادي الأهلي.
وفاز الفريق الأول لكرة القدم بنادي الزمالك على نظيره إيليكت التشادي بهدفين دون رد في المباراة التي أقيمت بينهما بإستاد أحمدو أهيدجو بالكاميرون في ذهاب الدور التمهيدي لبطولة دوري أبطال أفريقيا ليقترب من حسم التأهل لدور الـ32 للبطولة.
ومن المقرر أن تقام مباراة العودة بإستاد القاهرة الدولي يوم 25 سبتمبر الجاري.
