مناخوليا.. حقوق المرأة

المرأة غير ملزمة برضاعة الأبناء.. مفيش سند قانونى يخلى المرأة تطبخ لزوجها.. لو زوجك اتحرش بيكى بلغى عنه الشرطة واعمليلو محضر فورا.. فيها إيه لو المرأة تزوجت أربع مرات زيها زى الراجل.. المساواة معناها إنى مش لازم أخلف علشان حضرتك تستمتع بكلمة بابا.. أنا أخلف بمزاجى وفى الوقت اللى يناسبنى زى ما حضرتك بتنام بمزاجك وفى الوقت اللى يناسبك.. المسح والكنس والطبيخ دى شغلانة الخدامين.. وحضرتك أنا مش متزوجاك علشان أخدمك انت وعيالك.. لو زوجك إتصل بيكى أثناء أوقات العمل الرسمية وكلمك فى شئون البيت والعيال إعمليلوا محضر رسمى لأن دا يعتبر تعدى على خصوصياتك كإمرأة عاملة
 

تصريحات غريبة ومريبة إذا ما توقفت عندها بالتأكيد ستأخذك إلى هنا لتأتنس بنا ونأتنس بك داخل سور العباسية حيث عنبر العقلاء وجروب المناخوليا ضحايا تصريحات السيدات الفاتنات اللى دمهم زى الشربات من نوعية الدكتورة هبة قطب والإعلامية رضوى الشربينى ومن على شاكلتهن من سيدات المجتمع ورائدات المجلس القومى للمرأة بدعم من بعض مشايخنا الكيوت وأنصار المرأة من رواد الفضائيات الذين هاجوا وماجو لمجرد أن دكتورة تنصح طالباتها فى حفل تخرجهن بأن لا تأخذهن وظيفتهن الجديدة عن بيوتهن وأسرتهن وأبنائهن وأن يصنعن توازنا يليق بهن كأمهات وزوجات بجانب كونهن طبيبات محترمات.. إلا أن كلام الدكتورة لم يعجب السيدات الفاتنات الراقيات والتعلب فات وفى ديلو سبع لفات.. وأنا هنا فى المناخوليا أنطق بالآهات ومعى كل الآباء والأبناء والأمهات الذين هم ليسوا كالأمهات الفاتنات ذوات حقوق المرأة والحريات!