مرتضى منصور يهاجم الكواليني.. ويحذر بمقاطعة قناة "أون تايم سبورت"
قال المستشار مرتضى منصور، رئيس نادي الزمالك: "أنا مستغرب من معلق مباراة الأهلي والاتحاد السكندري محمد الكواليني وبقول له هو انت بتقيم الأندية، وعمال يقول الأهلي أكبر نادي في التاريخ والعالم وانت مالك، الأهلي كان بيلاعب سيد البلد ولو مش عارف قيمة سيد البلد روح يا ابني".
مشكلة المعلق محمد الكواليني
وأضاف خلال مداخلة هاتفية ببرنامج "ملعب البلدوزر" الذي يقدمه مجدي عبد الغني بقناة "الشمس": "بقول لسيف الوزيري إيه المعلقين دول اللى إنتوا جايبينهم يعلقوا ويفخَّموا في النادي الأهلي بشكل مبالغ فيه، وإزاي مش واخدين بالكم من اللى بيعمله شوبير ضد الزمالك".
مقاطعة قناة أون تايم سبورت
وأكد: "لو عايز يا محمد الكواليني تفخَّم في الأهلي روح أعمله في قناة الأهلي علشان الناس تحترمك، وإحنا هنقاطع قناة أون تايم سبورت إذا استمر الوضع الحالي، إحنا كمان شايفين عدم مهنية شوبير ومواقفه ضد الزمالك، ولآخر مرة أحذر القناة وبقول لهم اللى بيعمله شوبير وأحمد الشناوي وسمير عثمان بيكملوا اللى بيعمله علاء صادق بالظبط".
مشكلة شوبير
ولفت: "شوبير مش شايف قدامه غير ابنه اللى بياخد 5 ملايين جنيه وبس".
وأشار: "علاء صادق بيروج إن الدولة ضد الأهلي، إزاي ضد الأهلي؟! ده مرتضى منصور اللي سقط في انتخابات ميت غمر اللى محدش يكسبني فيها، ومجلسي اللى تم حله، فين الدولة اللى معايا؟!، ده أنا قعدت سنة في البيت من غير ما أعمل حاجة، هو مش أحمد موسى وعمرو أديب شوِّهوني بالفساد وأنا نظيف ومعملتش حاجة.. فين حقي بقى؟!".
