عمرو أديب يهاجم سيد عبد الحفيظ: إيه السواد اللي جواك دا.. ولازم تتعاقب
علق الإعلامي عمرو أديب، على تجاهل مدير الكرة بالنادي الأهلي سيد عبد الحفيظ الممر الشرفي الذي قام به لاعبو الزمالك والجهاز الفني للنادي الأهلي.
إبعاد شيكابالا عن رفع كأس مصر
وقال عمرو أديب خلال برنامج “الحكاية” المذاع علي قناة "ام بي سي مصر:"هو حد شاف شيكابالا وهو بيرفع الكاس؟ إيه حالة الهرج والمرج ومفيش ترتيب ليه خلال الاحتفالية ليه؟".
لقطة سيد عبد الحفيظ
وأضاف:"سيد عبد الحفيظ بغضب ايه اللى انت عملته ده أنت مدير كرة كبير إزاي تمشي برة ممر الشرف دي حركة بلدي ومفيهاش أي أخلاق رياضية، الممر الشرفي ده علشان يحيوك، انت لازم تبقى قدوة وإيه السواد اللي جواك ده، ماتخسر يا أخي، فيه ناس في الأهلي مبيعرفوش يخسروا ويأبى الخسارة، أنت لازم تتحلى بالروح الرياضية وتكون نموذج".
وتابع: "سيد عبد الحفيظ لازم محمود الخطيب يعاقبه ويوجه له اللوم واتحاد الكرة يوقع عليه الغرامة وهو غلط ولازم يعتذر، على فكرة المفترض ان ده نادي المبادئ هل اللى انت عملته ده مبدأ من المبادئ".
مشكلة جماهير الأهلي
وأردف:"لما الأهلي يكسب الزمالك احنا كزملكاوية بنشرب المر طول الليل، والأهلاوية عايزين أول لما يخسروا يعملك تريند الروح الرياضية، طيب واحنا مش هنحفل يقولك لأ اسكت، على فكرة مصر طلع منها زملكاوية كتير أوي، انا عايز انبسط وافرح، احنا كسبنا بشرف واحلى من الشرف مفيش، بقول للنادي الأهلي اقفوا جنب جمهوركم، احنا شربنا المر وبرضو سنظل أوفياء".
وأكمل:"جمهور الأهلي اتربى عنده فكرة عظيمة ان ناديه دايما هيكسب في الاَخر ودي اتربت جواه، وفي وسط الماتش بيفكرنا بمحمد نوح زمان مدد مدد شدي حيلك يا بلد، وانا بقوله الماتش مش بيتقلب بس بالهتاف، والماتش كان فيه زيزو ونيمار وبن شرقي، وبقولهم مش كل مرة تكسب الجرة، الف مبروك للزمالك وبقول للإعلام الرياضي ارحمونا بقى اتخنقنا، المفروض الأولوية في التحليلي للي كسب اعطونا حقنا بقى، انتوا عايزين كورة ودوري ولا سيطرة نادي واحد بس".
وأشعلت خسارة النادي الأهلي كأس مصر، فتيل الغضب داخل جدران القلعة الحمراء مما أدى لهجوم جماهير الأحمر على مجلس الإدارة واللاعبين.
أصدر محمود الخطيب رئيس النادي الأهلي قرارًا بتوقيع غرامة مالية لكل لاعب بالمارد الأحمر قدرها 30 ألف جنيه، وهو ما أبلغ به سيد عبد الحفيظ مدير الكرة اللاعبين اليوم.
يذكر أن مجلس إدارة الأهلي قرر استمرار تجميد مستحقات اللاعبين حتى تحسن الأداء خلال المباريات خاصة بعد خسارة كأس مصر أمام الزمالك أمس بهدفين مقابل هدف.
