الدماطي: عظمة الأهلي في جمهوره.. وعلينا تخفيض سعر تذاكر المباريات

علق محمد الدماطي، عضو مجلس إدارة النادي الأهلي، على  الجمهور الحاضر لمباريات الأحمر خلال الفترة الماضية، وطلبه تغيير سياسة شراء التذاكر.

ونشر "الدماطي" عبر حسابه الشخصي على موقع التواصل الاجتماعي "فيسبوك": "لأول مرة من خمس سنين هتكلم وأنا عضو مجلس، لكن بلسان حالي لوحدي، عشان الأمانة تحتم عليا ده".

وتابع: "وعارف سيل النقد اللي هينزل عليَّ وتعليقات نقد على الجانب الفني اللي أنا واثق إن شاء الله أنه مع الوقت أكيد هيتصلح، وثقتي كاملة في إدارة الكرة على تخطي الصعاب، لكن فكرة أني عشت حياتي كلها في المدرج تخليني أقول الكلمتين دول".

تخفيض سعر التذاكر

وواصل: "لازم إعادة نظر سريعة  في نظام دخول الجماهير، لا نظام الـfan Id، ولا أسعار التذاكر بتدخل نوعية جمهور الأهلي بتاع زمان ولا فئات الشعب اللي بتحب الأهلي والكورة بجد، لازم سعر التذكرة ينزل لحد ٢٥ جنيها علشان أي حد يوصل الملعب رايح جاي ويأكل حاجة هيدفع زيهم مرتين.. يعني الماتش الواحد حهيقف بأقل حاجة ٧٥ جنيها.. وده يخلي الناس اللي مرتباتها ٣ و٤ آلاف جنيه في الشهر يقدر يروح على الأقل ٣ ماتشات في الشهر، عكس دلوقتي اللي الماتش بيدخل في أقل حاجة ١٥٠ جنيها، نظام الحجز يرجع زي زمان من قدام النادي؛ منافذ وشركات الاتصالات كلها مش الرعاة بس، والشراء بالبطاقة ورقم التليفون ويتعمل استعلام أمني لو في مشكلة التذكرة بتقف من على البوابة زي أوروبا، وتتفتح الملاعب بسعة كاملة، إحنا مصر ونعرف نؤمِّن أي عدد وفي أي وقت مفيش دولة في المنطقة عندها ربع استقرارنا الأمني".

وأكمل: "لو فيه حاجة حاسس إني مقصر فيها هي إني مش قادر أشوف المدرج مقصور على مجموعة معينة، اللي حصل في ٢٠١١ وربط الكرة بالسياسة كانت غلط مش حيتكرر تاني إن شاء الله، محدش أساسًا يقدر يفكر يهز الاستقرار اللي إحنا وصلنا له بعد معاناة رهيبة، ده لو حد حب بس يفكر يدخل سياسة تاني بقية الجمهور هي اللي هتسكتو مش الأمن حتى".

واختتم: “عظمة النادي الأهلي هي مستمدة من شخصية جمهوره، وجمهوره هو جمهور المدرج، لو الشخصية دي مع الوقت تاهت هتبقي خطر كبير على رفعة النادي في المستقبل”.

يذكر أن النادي الأهلي خسر أمام بيراميدز بهدفين دون رد في المباراة التي جرت بينهما أمس على ملعب الدفاع الجوي.