العجول الهربانة تتصدر التريند.. والنشطاء: أحسن من أفلام العيد | فيديو
تصدر هاشتاج "العجول الهربانه" تريند مصر على موقع التواصل الاجتماعي "تويتر"، في أول أيام عيد الأضحى المبارك، حيث تداول نشطاء مواقع التواصل الاجتماعي مقاطع فيديو لهروب عدد من عجول الأضحية، عند ذبحهم في أول أيام العيد.
العجول الهربانة
وأظهرت مقاطع الفيديو أحد العجول وهو يحاول الهروب من صاحبة، مؤديًا بعض حركات التايكوندو، في حين ظهر عجل آخر يدخل الصيدلية هربًا من صاحبه، وثالث هرب من صاحبه قفزًا في الترعة.
وتفاعل نشطاء مواقع التواصل الاجتماعي مع هاشتاج "العجول الهربانة"، فقالت أم أحمد: "فيديوهات العجول الهربانة هيا العيدية بتاعتي".
وعلقت رحاب قائلة: "الواحد مش عارف من غير فيديوهات العجول الهربانة كان هيقضي العيد إزاي".
أحسن من أفلام العيد
وقال أحمد السيد: "الناس كلها بتستنى العيد عشان تفرح وأنا بستناه عشان التريند ده #العجول_الهربانة".
وردت خلود إبراهيم: "إخوني وأخواتي لقد تسرعنا في الحكم علي العجول الهربانة إنما العجول اتطورت وبقت بتلعب تايكوندو". أما محمد واهم فقال: "#العجول_الهربانة الهروب مستمر".
وعلقت داليا رأفت قائلة: "فيديوهات العجول الهربانة ما بتضحكنيش ولا فيها أي كوميديا بالعكس. دي بتقطع قلبي".
في الوقت الذي قالت فيه زينب: "الناس كلها روحت وفطرت ونامت إلا أنا قاعدة مع فيديوهات العجول الهربانة بجد تحفة.. مش ببطل انبهر بيها كل سنة بجد".
العجول الهربانة في الشوارع
أما أحمد فعلق قائلًا: "كلمة في سركم.. بعد ستر ربنا عز وجل.. لولا أن أنا ديكتاتور ومانع أولادي ينزلوا فيديوهاتي على فيسبوك أو تويتر كان زماني في عيد الأضحى واحد من أشهر ملوك وضحايا فيديوهات العجول الهربانة في مصر والشرق الأوسط كله.. #العجول_الهربانة".
وقال بسيوني: "العجول الهربانة أحسن من أفلام العيد". وعلق كيمو على فقال: "#العجول_الهربانة العجل تحول إلى فيراري".
وطالب إسلام محمود بـ"#انترنت_غير_حدود_في_مصر عشان نتفرج ع العجول الهربانة"، ورد خلف عبد الله: "كبرنا وبدل ما كنا بنستنى فيديوهات العجول الهربانة بقينا ننزل بنفسنا ندور عليهم في الشوارع".
أما آماني محمد فقالت: "يعني بدل ما اقولهم نازله اتفسح ولا هعيد على العيله اقولهم نازله اتفرج على العجول الهربانة"، وردت رانيا حسن " شاي بلبن وقُرص وفيديوهات العجول الهربانة هذا هو عيدي". وعلق علي جودة قائلًا: "العيد ده بحبه اوي لأن مبحترش اتفرج فيه على أنهي فيلم أنا بعمل خربوش الشاي واقعد قدام فيديوهات العجول الهربانه واتمزج".
أما المنسي فقال: "العجول الهربانه الجزار مش هاسيبك العجل أنت متأكد طب بص الحركة دي".
وقالت ريهام رهومة: "بمناسبة فيديوهات العجول الهربانة في عيد ما كنت قاعدة عند واحدة صاحبتي في البلكونة بعد الصلاة وهي بيتها بعيد عني وفي نص ما بتكلم عادي وسرحانة في البلكونة لقيت عجل بيجري وبابا بيجري وراه وقعدت حبة بحاول استوعب ليه أبويا بيجري ورا عجل وايه اللي جايبهم هنا".
