"أخدت محو الأمية بالعافية".. حمو بيكا لطلاب الثانوية العامة: متغلطوش غلطتي
وجه مؤدي المهرجانات حمو بيكا رسالة مؤثرة لطلاب الثانوية العامة، مع اقتراب امتحاناتهم في 26 يونيو الجاري، ولطلاب الجامعات، طالبهم بأن يهتموا بتعليمهم وشهاداتهم، قائلًا إنه غير متعلم، وحصل على "محو الأمية" بعد مشقة، مؤكدًا أن طعم النجاح مع العلم يختلف عن طعم النجاح بدون علم.
معاناة حمو بيكا
وكتب حمو بيكا تدوينة على الفيس بوك "رسالة لطلاب الثانوية العامة والكليات".. هو انا اه مش متعلم واخدت (محو الأمية) بالعافية، لكن ده مش حاجه تفرح ولا تقول (عندك بيكا اهو مش متعلم بس ناجح)، صدقوني والله طعم النجاح مع العلم مختلف تمامًا عن طعم النجاح من غير علم".
وقال حمو بيكا: "العلم بيفرق في كل حاجه في الدنيا، كمية معاناه بشوفها يوميًا بسبب اني مش متعلم كبيرة أوي مش بتمني حد منكم يشوفها أو يتعرض لها، العلم بيستر كتير اوي وبيخليك واعي ومتفتح في كل مجالات الحياة".
الشارع علمني
وأضاف "هو اه الشارع علمني كتير، بس مش زي المدارس والجامعات، حتي لو مش هتشتغل بشهادتك وحتي لو دخلت كلية مش بتحبها، بس يكفي انك متعلم ومعاك شهادة تقدر تسد بيها عين الشمس.."
وتابع بيكا "اتعلموا وخلوا بالكم من تعليمكم وشهداتكم لأنها هتفرق كتير اوي معاكوا ومع عيالكم بعد كده.."
واختتم بيكا قائلًا: "انا اه مادخلتش مدارس وماتعلمتش، بس حابب كل اللي حواليا ناجح ومتعلم واوعي يوم تقول اهو فلان ناجح بس مش متعلم"
العودة لنقابة الموسيقيين
الجدير بالذكر أن مؤدي المهرجانات حمو بيكا يجري محاولات الأن للعودة من جديد لنقابة الموسيقيين، بعد قرر النقابة بعدم التعاون معه مجددًا نتيجة رسوبه في اختبار الأصوات الأخير لعام 2021، وتم وضع اسمه ضمن قائمة الممنوعين من الغناء داخل مصر.
وينتظر حمو بيكا موقف نقابة الموسيقيين، للتقدم لأداء اختبار الأصوات مرة أخرى، حيث طالب بيكا وساطة عددًا من المطربين الشعبيين، من بينهم الفنان عبد الباسط حمودة، ليجري مكالمات مع مجلس إدارة نقابة المهن الموسيقية، لكي يتم منح بيكا فرصة للقيد من جديد، وعدم غلق الباب أمامه مرة أخرى.
ويذكر أن نقابة المهن الموسيقية تفتح باب اختبار الأصوات من جديد خلال شهر يوليو المقبل، لكن لم تحدد النقابة إمكانية مشاركة حمو بيكا من عدمها في الاختبارات حتى الآن، خاصة أنه سقط في اختبار النقابة لعامين متتاليين 2020 و2021.
