أول تعليق من لميس سلامة بعد حريق شقة والدتها في الاسماعيلية| فيديو
خرجت الإعلامية لميس سلامة، عن صمتها للتعليق على تعرض منزلها لحريق في منطقة شبين الكوم بمحافظة الإسماعيلية.
وكتبت لميس سلامة عبر صفحتها الرسمية بموقع فيسبوك: الحمد لله إحنا بخير والكابوس خلص، شقة أمي الشقة الوحيدة في العمارة اللي اتضرت لأن إحنا أول دور، فطبعا الحريق طالنا والأجهزة اتحرقت، والبيت طبعا غرق مياه عشان المطافي ينقذوه.
وأضافت لميس سلامة: الحمد لله أني قدرت أفكر بسرعة أول ما شميت الدخان وفصلت الكهرباء، وأخدت أمي وبنتي نزلتهم الشارع بسرعة، وده كان القرار اللي أنقذنا وأنقذ العمارة كلها لأن لو ما كناش فصلنا الكهرباء كانت حصلت كارثة أكبر ولو ما كناش نزلنا كان جرا لنا حاجة.. الحمد لله.
وكانت لميس سلامة استغاثت، في بث مباشر عبر صفحتها على موقع التواصل الاجتماعي فيسبوك، قائلة: يا جماعة محتاجين النجدة والمطافئ بسرعة اللي في الإسماعيلية أرجوكم عمارتنا في شبين الكوم فيها حريق كبير.
فى هذا السياق، نشرت “لميس” عدد من الصور لأحد الظبابط معلقة بقولها: “أنا عايزة أشكر الظابط المحترم ده لانه لما لاقي الموضوع كبير وعربيات المطافي مش ملاحقة لبس ودخل بنفسه جوة الحريق بقوله استني يافندم هيطفوها بالخراطيم قالي لازم ننقذ السكان وبقي يطلع الاجهزة من جوة بنفسه ويساعد الرجالة اللي معاه الله يباركله ويحفظه ويسترها مع ولاده”
وأختتمت بقولها: “تحية ليه ولكل الرجالة اللي معاه ولمأمور قسم ثان اللي في ثواني كان هنا وكل الظباط المحترمين اللي كانوا معانا النهاردة..الحمدلله”
وكانت نشرت “لميس” فيديو للمنزل اثناء الحريق عبر حسابها الرسمي على موقع التواصل الإجتماعي “فيس بوك”
ودفعت الحماية المدنية بالإسماعيلية بـ3 سيارات إطفاء للسيطرة على الحريق، وحاصرت قوات الحماية المدنية النيران، وتم فرض كردن أمني، واستمرت أعمال الإخماد؛ حتى نجحت في السيطرة على الحريق بعد 10 دقائق من الاستغاثة.
وبحسب ما كشفته المعاينة الأولية للحريق فقد نشب نتيجة لحدوث ماس كهربائي، تسبب في انفجار 5 أسطوانات غاز بالعقار، ما أدى لانتشار النيران.
