حسن يوسف: أبقى طفس لو بصيت بره بعد زواجي من شمس البارودي |فيديو

قال الفنان حسن يوسف: "شمس البارودي مابتغيرش عليا لأنها في الوسط الفني مدركة جدا فكرة المعجبين بيا ومتفهمة الموقف ومبتغيرش، وأول مرة دخلنا نادي الجزيرة بعد جوازنا شافت البنات بيتصوروا معايا كنت خايف أنها تتضايق لقيتها مش متضايقة فقالتلي أنا عارفة أنك ممثل ولك معجبين، ويوم الأحد الماضي احتلفنا باليوبيل الذهبي لحياتنا مع بعض بعد 50 سنة جواز".

شمس البارودي جميلة الجميلات

وأضاف خلال الجزء الثاني من لقائه ببرنامج "كلام الناس" المذاع على قناة "إم بي سي مصر": "شمس البارودي حطتني في موقف محرج بعد ما أطلقوا عليها لقب جميلة الجميلات، وأنا اتجوزتها فمبقاش عندى عذر أبص لحد تاني، وأبقى طفس لو بصيت بره".
 

أجمل فصول حياة حسن يوسف

وتابع: "لقب جميلة الجميلات لشمس البارودي أطلقته الصحافة اللبنانية، وحصل ما بينا الحب والغرام واتجوزنا، ويكفى لها أنها أخدت موقف الاعتزال وهي 27 سنة في قمة شهرتها وجمالها وتألقها وأكبر أجر في الوسط الفني، واعتزلت للتفرغ لبيتها وزوجها وأولادها".

وأردف: "أجمل فصل في حياتي وكتابي هو شمس البارودي".

قصة زواج شمس البارودي

ولفت: "من أول ما اتقابلنا أنا وشمس البارودي كانت حذرة مني، وهي أصلا من سوريا من عائلة البارودي، وعجبني فيها أنها عائلية وكانت علطول شبطانة في عيلتها ومسيبتش بيت أبوها وأمها وحسيت أنها بيتوتية، ومحبة للأسرة وللبيت والعشرة الطيبة، فأعجبت بجمالها وأخلاقها وبدأ الحب يتسرب وفي يوم اتشجعت وقلت لها بحب فقالتلي سمعتك سبقاك فمتتسلاش عليا وأبقى واحدة ضمن الدفتر، فقلت لها بحب فعلا وياريت نتخطب ونكتب الكتاب فكلمت والدها وطمنها من ناحيتي وخطبتها في سوريا في يناير واتجوزنا في فبراير".

حسن يوسف عن سعاد حسني: كانت بتحكيلي على مشاكلها الخاصة.. ومرة رحتلها البيت الفجر بالروب

حسن يوسف: كوب ماء الشيخ الشعراوي غير مجرى حياتي.. وهذا رده على نية شادية حرق أموال الفن

قرار اعتزل شمس البارودي

وتابع: "أنا غيور جدا وعرفت مني إن غيور علشان كده لما عملت عمرة قررت انها تعتزل، فقلت لها لأ استني بس متعمليش تمثيل الا معايا فقالتلي شوفت بقى بتغير ازاي، واَخر فيلم ليها كان مع عادل امام "اتنين علي الطريق"، بعدها اعتزلت التمثيل".

وكشف الفنان حسن يوسف، في الجزء الأول من نفس اللقاء، كواليس اعتزال زوجته الفنانة المعتزلة شمس البارودي، التمثيلَ وإنهاء مسيرتها الفنية.

رحلة العمرة وراء الاعتزال

وقال خلال لقائه ببرنامج "كلام الناس" المذاع على قناة "MBC مصر": "عندما عادت شمس البارودي من رحلة العمرة سنة 1981 لم أعرفها حينها قررت الاعتزال.

خسارة 40 ألف دولار

وأضاف: كنت أحضر لفيلم «غرام صاحبة السمو»  وقبل رحلة عمرتها سافرنا لباريس، واشتريت لها ملابس الفيلم بنحو 40 ألف دولار.. يضحك: «قلت لها والهدوم اللي إحنا ادبسنا فيها.. راحت عليا الفلوس والحمد لله».

وأكمل: "رجعت شمس من العمرة معتزلة، وخسرت الـ40 ألف دولار".