كشف تفاصيل خلافه مع ميدو.. أحمد السعدني: اتضربت من جمهور الزمالك | فيديو
قال الفنان أحمد السعدني:"اتشتمت واتضربت في الإستاد أنا وأحمد السبكي علشان أنا أهلاوي في مباراة الأهلي والزمالك، واحنا قاعدين جنب جمهور الزمالك".
ضرب أحمد السعدني في الإستاد
وأضاف خلال لقائه ببرنامج "حبر سري" الذي تقدمه الاعلامية اسما إبراهيم بقناة "القاهرة والناس":"اتضربنا في الاستاد بالأزايز من جماهير الزمالك، وأنا طول عمري أهلاوي متعصب، ومرة مدخلتش امتحان علشان ماتش الأهلي وأروح الإستاد".
دعم الأهلي
وتابع: "من صغري وأنا بروح الاستاد، وكان معايا في الفصل كريم حسن شحاتة واقعد اغلس عليه، ولما حسن شحاتة كان ماسك الزمالك اللى دخلني الماتش كريم علشان مكنش معايا تذكرة".
مشكلة أحمد فهمي
ولفت: "الفنان مينفعش يكون متعصب في الإنتماء، وكنت بكلم أحمد فهمي كتير واقوله مينفعش تقعد تشتم الناس وهما يشتموك، وأنا عمري ما هخش في مشادة أو اكتب كلام مش لطيف".
الخلاف مع ميدو
وأشار:"أحمد حسام ميدو صاحبي وبحبه ومرة كتب حاجة وانا دخلت قلتله جمهور الأهلي بيحبك ليه تضايقهم منك فدخل رد عليا رد مش لطيف وانا انسقت ورديت عليه رد مش كويس، وصار بينا خلاف وقتها وحصلت مشكلة بينا على المستوى الشخصي ومن وقتها علاقتنا ببعض مش كويسة بس انا مسامحه".
وكشف الفنان أحمد السعدني، في نفس اللقاء، آخر تطورات الحالة الصحية لوالده الفنان الكبير صلاح السعدني، مؤكدًا أن والده اتخذ قرارا منذ اَخر مسلسل شارك فيه "القاصرات" في 2013 بالابتعاد عن المشهد الفني.
الحالة الصحية لصلاح السعدني
وأضاف: حالة صلاح السعدني الصحية جيدة ولا صحة للشائعات التي تتردد حول مرضه، هو بخير ولكنه اكتفى بما قدمه في التمثيل.
قرار الاعتزال
وأضاف:"أنا لو أقدر اَخد قرار الابتعاد عن التمثيل من بكرة هعمل كده لأن فكرة الشغل عموما مرهقة".
نصائح صلاح السعدني
ولفت: "أنا عايش بنصايح صلاح السعدني وأول نصيحة قالها ليا أوعى تدور علي شهرة أنت مشهور من وانت صغير، ولا تدور علي فلوس أنا مش حارمك من حاجة، ولا تدور علي فكرة النجومية لأن اللى بيعيش حاجتين حب الناس وحاول ترويها وتكبرها وتنميها، والحفاظ علي موهبتك".
