غراب البين يكتب: مشكلة الإيجار القديم بين المالك والمستأجر
بعد يوم كامل من اللف والدوران والمرازية فى خلق الله وقفت فوق البلكونة بتاعة شقة الواد "محمود سوسته" اللى ساكن هنا فى ميت غمر بالدقهلية علشان أريح جتتى وأقضى ليلتى.. لكن صوت محمود سوستة العالى عامل إزعاج فى المكان
محمود قاعد على المقهى اللى تحت البلكونة ومعه ممدوح إبن صاحب العمارة وبيتكلموا فى الإيجار.. ممدوح عايز يزود الإيجار أربعون جنيها علشان يكتمل لخمسين جنيه وخاصة إن الدنيا ولعة نار.. ومحمود ماعندوش مانع يزود الإيجار لكن خمسة عشر جنيها فقط ليصبح 25 جنيه.. الأمر الذى جعل صوت ممدوح يرتفع ليصرخ فى وجه محمود ويقول له: انت أصلا المفروض تمشى من الشقة لأن والدى أجرها لوالدك وليس لك.. وطالما والدك توفاه الله فخلاص ملكش حق تقعد فى أمها
محمود زغر لممدوح وقال له: الكلام دا على جثتى.. والدى دفع لوالدك خلو رجل المفروض ترجعهولى وساعتها نشوف الشقه تساوى كام وآخد منك الخلو ونصف ثمن الشقة
وهنا ضحك ممدوح ساخرا وقال له: أبوك لم يدفع أى خلوات.. والعقد مش مكتوب فيه خلوات
فرد عليه محمود بضحكة أكثر سخرية يصحبها صوت يصدر من "مناخيره" وقال له: ماهو لو اتكتب فى العقد كان أبوك هيتحبس لأن الخلوات كانت ممنوعه
والدى دفع لوالدك مائة وخمسون جنيها من خمسين سنة كانت تشترى 200 جرام من الذهب.. شوف سيادتك الـ200 جرام دهب تساوى كام جنيه فى الوقت الحالى.. وثانيا قانون الإيجار القديم لا يسمح لمعاليك باسترداد شقة أجرها والدك بعقد إيجار قديم أبدى
فرد عليه ممدوح قائلا: دا عند أم ترتر.. عموما القانون بيتناقش فى البرلمان وخلاص هتنطردوا فى الشارع
وهنا وقفت على قدمى ورفرفت بأجنحتى وأخذت أنعق بأعلى صوتى "قاق قاق" فراح الإثنان ومعهم باقى زبائن المقهى يهشوننى ويقولون لى غور من هنا يا غراب البين جبتلنا الفقر والنكد
فهربت طائرا بأقصى سرعة قبل أن يحدفوننى بالطوب كعادتهم ولسان حالى يقول: بقا أنا اللى جبتلكم النكد والفقر يا شوية بنى آدمين؟!.. دا أنتم بتأكلوا فى بعض وبتستغلوا بعض وماحدش منكم طايق التانى ونفسكم تخلصوا من بعض فى أقرب وقت
يعنى لا المالك اللى ورث الشقة عن أبيه عايز يرحم المستأجر ولا المستأجر عايز يوصل لحل ويزود الإيجار لمائة جنيه مثلا ليرضى المالك الوريث الذى أصبح لا يملك شئ بعد أن كان طفلا مبغددا وثريا من خلال الإيجارات التى كان يجمعها والده أول كل شهر منذ سنوات طوال
يا شوية بنى آدمين حاولوا أن تجدوا حل وسط يرضى جميع الأطراف.. لا لطرد المستأجر والمغالاة علية.. ولا لظلم المالك وإعطائه إيجارا شهريا قديما لا يشترى له باكو شاى العروسة.. ماهو برضو مافيش إيجار بـ 10 جنيه ونحن نعيش فى عام 2022 ،، مش كدا ولا إيه؟!.. جاتها ستين ألف نيلة اللى عايزة تخلف بنى آدمين زيكم!
