حفيد كمال الشناوي يكشف عن موقف محرج تعرض له بسبب زوجة هاني شاكر
خرج الفنان الشاب عمر الشناوي، حفيد الفنان الراحل كمال الشناوي، عن صمته وكشف عن موقف محرج تعرض له على يد زوجة الفنان هاني شاكر.
وكتب “عمر الشناوي” عبر حسابه الشخصي علي موقع التواصل الإجتماعي “فيس بوك”: أنا نفسي احكي عن موقف حصلي اثناء ذهابي للاوبرا لاستلام تكريم بالنيابه عن جدي الراحل كمال الشناوي ربنا يرحمه. وكان الحفل ده بيكرم فيه الزعيم عادل امام والفنانه الجميله لبني عبد العزيز وبيقدم الحفل الفنان هاني شاكر نقيب الموسيقيين… وقتها كان عمري ٢١ سنه ولبست بدلتي الوحيده ورحت وكنت مرعوب بكوني أول مرة يبقي ليا صلة لوحدي بالوسط الفني وناسه بدون وجود جدي معي. فقعدت في المكان المخصص لجدي الله يرحمه ومنتظر التكريم يبدا".
زوجة هاني شاكر
وتابع: "دخلت زوجه الفنان هاني شاكر مصطحبة معها ابنها وصديق له وكان المكان المخصص لهم بجانبي ولكن المشكلة هنا أنه كان مخصص لهم كرسيين فقط وهما ثلاثه أشخاص قامت السيدة زوجه الفنان هاني شاكر نادهه الفتاة المسئوله عن تنظيم الجلوس في القاعة وقالتلها مين ده وقاعد هنا ليه.
البنت وشوشتها في اعتقادي ان ده المكان المخصص لكمال الشناوي أو ده حفيد كمال الشناوي او حاجه تانيه الله اعلم قامت قايله بصوت عالي يقوم احنا ثلاثه هنقعد جنب بعض هنا. البنت ردت قالتلها ده مكانه ومقدرش اقومه فضلت تردد "يقوم انا مرات هاني شاكر وهو اللي بيحيي الحفلة" وبتبصلي بصات اكني حشرة قاعدة وفضلت واقفه ومش ناويه تتنازل غير لما انا أقوم".
لبنى عبد العزيز
وقال عمر: "البنت ردت عليها قالتلها انا عندي حل ان حضرتك تقعدي في الصف ده وابنك وصديقه يقعدوا في مكان تاني في الصف اللي خلفك مباشرة يعني مش بعيد ردت قالتلها "لا هو يقوم احنا هنقعد هنا". انا كنت محرج جدا الان أولا انا لوحدي ومحدش يعرف أنا مين ولان الناس كلها بدات تتفرج عليا اكني قاعد في مكان مش مكاني لان مفيش انسان هيقوم حد من مكان مخصص له بالجراه والتعسف ده. في هذه اللحظه سمعت صوت لطيف جدا وكانت الفنانه لبني عبد العزيز قالتلي تعالي يا حبيبي اقعد جنبي الكرسي ده فاضي فقمت بسرعة لان كنت عاوز الموقف ده ينتهي والناس تنشغل بحاجه تانيه قامت مطبطه عليا وقالتلي متزعلش".
واضاف: “الموقف ده اثر في نفسيتي جدا الان اولا حسيت اني مليش قيمه… وثانيا حصل في داخلي حاله لخبطة لأن وقتها حسيت بكره تجاه زوجة الفنان هاني شاكر وله هو شخصيا وفنه لأن كان اعتقادي أن الفن وأهله رقي وأخلاق واللي حصل معايا ده كان ابعد ما يكون عن مخيلتي لأهل الفن ولكن يشاء القدر اني في نفس الموقف فنانة جميلة مثل لبني عبد العزيز تعدل الدفة وتوريني ان في كل مكان في دائما الحلو والوحش”.
و اختتم حفيد كمال الشناوي حديثه قائلا: “الفن رقي،الفن اخلاق، الفن ليس باللبس والمظاهر والتفاخر بل بالسيرة الطيبة وحب الناس ليك ولفنك. في رأيي الشخصي المتواضع وقف اي فنان لسبب مظهره وان ده لا يتماشي مع المظهر العام فيه تعسف وغموض لأن من يقرر ما هو المظهر اللائق طالما هو غير معارض لقانون الدوله. عاجبني او لا ده مش من حق اي حد لان الازواق تختلف. احتوي الفن ونميه اجتمع بيهم وطور منهم حتي لو بورش من النقابه لتطوير الفن وادعمهم وساعدهم وهنا تبقي فنان بجد وقلبك علي الفن”.
مسلسل قواعد الطلاق الـ45
وفي سياق آخر.. أعلن عمر الشناوي،مساء أمس الجمعة، عن انتهائه من تصوير جميع مشاهده بمسلسل "قواعد الطلاق الـ 45".
و مسلسل "قواعد الطلاق الـ 45" مأخوذ عن المسلسل الأمريكي Girlfriends’ Guide to Divorce، الذي تم عرضه فى 2014 وحتى 2018 على خمسة أجزاء.
العمل يخوض بطولته إنجي المقدم، عمر الشناوي، هيدي كرم، سالي شاهين، صدقي صخر، جيهان الشماشيرجي، وإخراج مصطفى أبو سيف، وتدور أحداثه في 45 حلقة، ويُعد هذا المسلسل البطولة المطلقة الأولى للفنانة إنجي المقدم في الدراما التليفزيونية.
