سامى قمصان ينتقد المهاجمين لطريقة لعب موسيمانى ويكشف سر غياب محمد شريف
تحدث سامي قمصان المدرب العام للفريق الأول لكرة القدم بالنادي الأهلي عن الفوز برباعية نظيفة على نادي الإسماعيلي في الجولة الأولى من بطولة الدوري المصري.
تصريحات سامى قمصان
وقال قمصان في تصريحات لبرنامج الماتش الذي يقدمه الإعلامي هاني حتحوت عبر شاشة صدى البلد: "بداية مهمة جدا أداء ونتيجة، عندنا هدف واحد بنشتغل عليه في بطولة مهمة عاوزينها ترجعلنا واستعادة الدوري".
قمصان يوضح سر طريقه اللعب أمام الإسماعيلي
وتابع "إزاي الناس تنتقد التشكيل من قبل ما تشوف المباراة، الناس اللي بتحلل لعيبة سابقة كبار، كل مدير فني عنده رؤية ووجهة نظر وتصور في المباراة".
وأضاف: "لعبنا بطريقة اللعب دي قبل كدة في دوري أبطال أفريقيا، تشيلسي من أفضل فرق العالم بتلعب بنفس الطريقة، دي مش طريقة دفاعية، أنت بتلعب على حسب امكانيات اللعيبة والقوام الموجود مينفعش تنتقد طريقة قبل ما تشوفها".
وواصل قمصان: "نرى أن هناك تحفظا ضد الجهاز الفني وموسيماني تحديدًا رغم أن النتائج مقبولة جدًا، أتمنى الجماهير تبقى عندها ثقة في الجهاز الفني، في مدربين تانيين بتحقق بطولة واحدة في الموسم وبيكون في إشادة كبيرة بيها، مش عارف سبب الهجوم الكبير اللي بيحصل رغم تحقيق الألقاب، في حملة غريبة علينا".
واختتم مدرب الأهلي تصريحاته: "مليون في المية بيوصل لموسيماني الضغط والانتقادات والإشادة برضه، هو نشط على السوشيال ميديا وده ممكن ميكونش حاجة حلوة في مصر لكن عادي برة، الانتقاد بيكون مقبول لكن متوصلش لأبعد من كدة".
قمصان مشيدًا ببيرسي تاو: يلعب في 3 مراكز ويملك قوة شخصية كبيرة
وتحدث سامي قمصان عن الجنوب أفريقي بيرسي تاو وأدائه في مباراة الإسماعيلي، وقال قمصان" "بيرسي تاو بيلعب جناح يمين وشمال وراس حربة".
وأضاف: "موسيماني عارف بيرسي تاو كويس من أيام صن داونز، هو لاعب عنده شخصية كبيرة، وقوة شخصيته ظاهرة في انك تبقى بتلعب أول مباراة وعندك ثقة في نفسك وزمايلك اللي حواليك وتسجل".
وواصل: “نتمنى الاستمرارية لبرسي تاو ولسه عنده تحديات كبيرة، هو عمل نقلة كبيرة في خط الهجوم وثقة مع جماهير الأهلي سريعا”.
سامي قمصان يتحدث عن غياب محمد شريف أمام الإسماعيلي
وتتطرق سامي قمصان للحديث عن غياب محمد شريف مهاجم الفريق الأحمر عن مواجهة الإسماعيلي.
وقال قمصان: "وجود شريف على دكة البدلاء مش قرصة ودن أو حاجة".
وتابع: "محمد شريف من أسباب انتصارات الأهلي في الفترة اللي فاتت، هداف الدوري ومن نجوم الفريق في دوري أبطال أفريقيا".
وأضاف: "احنا دايما عاوزين يكون عندنا بدائل في كل مكان، شريف لعب مباراتين النيجر وكان في جهد كبير جدًا في المباراتين دول، هو لاعب لا غنى عنه وهيرجع مكانه قريب".
