زلزال في لندن.. عمرو أديب يحتفل بفوز الريدز ويرقص على أغنية The Egyptian King | فيديو
فرحة هيستيرية انتابت الإعلامي عمرو أديب، احتفالًا بالفوز التاريخي لنادي ليفربول على مانشستر يونايتد بخماسية نظيفة، وإحراز محمد صلاح هاتريك.
ورقص عمرو أديب على أغنية محمد صلاح The Egyptian King، قائلًا: "أغنية صلاح واسم مصر مكسرة الدنيا في الأولد ترافورد".
ذهول العالم أمام إبداع محمد صلاح
وقال خلال برنامج "الحكاية" المذاع علي قناة "mbc مصر": "النهاردة كان فيه زلزال في لندن، شيء لا يصدقه أحد، العالم كله وقف على رجل بعد ربع ساعة من مباراة مان يونايتد وليفربول.. العالم كله كان في حالة صدمة وذهول، وما حدث لم يحدث من قبل ويصعب أن يتكرر بعد ذلك، خماسية ليفربول مع الرأفة".
عبقرية محمد صلاح وأسطورة رونالدو المزيفة
وتابع: "يبدو أننا أعطينا اليونايتد ورنالدو أكبر من حجمهما، ونزل ليفربول وعمل إنجاز عبقري، مش عايز أسمع حد من هنا لآخر السنة يكلمني على أعظم لاعب في العالم وأحسن لاعب والأجدر بالكرة الذهبية، مش عايز حد يكلمني على تاريخ لاعيبة تانية في أوروبا أو العالم نحن نتحدث عن مو صلاح أعظم ظاهرة كُروية الآن في العالم، مانشستر يونايتد انهار تمامًا، ورونالدو فقد أعصابه وضرب لاعب ليفربول برجليه لأنه مش قادر يصدق لأنه كان نازل الماتش ليخرس كل الأفواه وحدث العكس ولم نر اليوم رونالدو ولا خياله والنهاردة شوفنا الهاتريك، العالم كله رفع القبعة اليوم لمحمد صلاح".
لعنة الفراعنة على سولشاير
وأكمل: "محمد صلاح قضى على سولشاير والمدرب قال إيه لعنة الفراعنة اللي جاتلي ويا ابني كده كفاية، حرام عليك إحنا عندنا عيال، أداء مو صلاح لا يوضع بعده حروف، ومنقدرش نقول مذهل أو عبقري".
انهيار فريجسون
وأضاف: "السير اليكس فريجسون كان منهارًا تمامًا، اليونايتد صارف 5 أضعاف ليفربول، الواد محمد صلاح ربنا بيحيه وإحنا كمان بنحبه والعالم بيحبه وبيحقق أرقام قياسية مذهلة، ده ميخدش 400 ألف إسترليني في الأسبوع ده ياخد اللى هو عايزه، وهو ينافس في كوكب الأرض ويقف العالم كله ليتحدث عن هذا الرجل، واليوم أغنية الملك المصري كانت تملأ أرجاء الأولد ترافورد، عليت اسم البلد وحطيته في مكان محترم وجميل، لاعبو ليفربول اتفقوا بعد الخماسية أن إكرام الميت دفنه والضرب في الميت حرام، محمد صلاح عمل إنجاز كبير ووكالات الأنباء العالمية تتحدث عنه".
عظمة محمد صلاح
واستطرد: "ربنا يحرسك ويحفظك من العين وتكبر ليا يا محمد صلاح، يا أبو مكة عملت حاجة عظيمة النهاردة وفرحتنا كلنا ومجهودك عظيم ونقلاتك هائلة".
