شريف مدكور يقتحم إستديو منى الشاذلي للاحتفال بشفاء لينا شاكر من السرطان | فيديو
وعلقت لينا شاكر على دعم ومساندة واحتفال شريف مدكور وأصدقائها بشفائها من السرطان قائلة: "دول حبايبي اللي وقفوا معايا ومحدش سابني منهم خلال فترة العلاج ومنحوني القدرة على تخطي الفترة العصيبة اللي مريت بها بعد إصابتى بمرض السرطان".
من جانبه قال الإعلامي شريف مدكور: إنه نصح لينا شاكر بأن تطل على الجمهور خلال لقائها مع منى الشاذلي بدون "باروكة" لتقديم رسالة إنسانية مفادها دعم كل مريض سرطان.
وتابع: "إحنا مطالبين بدعم كل الستات اللى بيعانوا من سرطان الثدى وسقط شعرهم، ولازم نطمئنهم بأنهم قادرين يتغلبوا على المرض ويرجع شعرهم ينبت من جديد".
وقالت الإعلامية لينا شاكر، في حديث سابق: إنها راضية بقضاء وقدر الله في إصابتها بالمرض الخبيث، مضيفة: "ربنا له حكمة في إصابتي بالسرطان".
ولفتت خلال مداخلة هاتفية ببرنامج "مساء dmc" الذي تقدمه الإعلامية إيمان الحصري بقناة "dmc": "أخذت كمية طاقة إيجابية كبيرة بعد إصابتي بالسرطان، وأشكر كل الناس التي تدعو لي وغمرتني بالكلمات الطيبة والرقيقة".
وتابعت: "عندي إصرار على قهر السرطان والعودة إلى حياتي الطبيعية".
وأعلنت الإعلامية لينا شاكر المذيعة بقناة "نايل لايف" إصابتها بمرض السرطان.
قصة والدتها مع المرض
وروت لينا شاكر قصتها مع المرض اللعين في منشور مطول عبر صفحتها على فيس بوك قائلة: أنا عشت مع أمي الله يرحمها تجربة الكانسر بكل حذافيرها وتفاصيلها من يوم ما اتشخصت ليوم وفاتها كانوا ١١ سنة ونصف".
أضافت: "كمية الألم اللي عشته معاها في التجربة دي مرعبة، وكانت دعوتي لربنا أنه يخفف عنها ويقدرني أني أسعدها.. وأكيد كنت بفكر مع نفسي ليه كل ده؟".
سردت قائلة: "قبل وفاتها بيومين وإحنا في المستشفى لقيتني بكتب كلام وكأني بكتب نعيها المهم أني في اللحظة دي شوفت حكمة ربنا بالنسبة ليا في كل اللي عدى وحمدته وشكرته لأني حسيت إن دي كانت أحلى حاجة أنا عملتها في حياتي، وكأن ربنا اداني وقت أحبها أكتر وأدلعها وأكون لها بنت كويسة، وأكون جنبها في كل لحظة زي ما كانت طول عمرها شيلانا عشان هي حقيقي كانت ملاك وأحن وأطيب ست في الدنيا.
الدكتور اللي عملها الكشف أول مرة زعقلي وقالي دي بتموت إنتوا جهلة، بس هي ما مماتتش وقتها وعاشت الحمد لله، والدكاترة بعد كده قالولي دي عملت record وأنها كانت بالكتير تعيش خمس سنين وده محصلش وتوفيت بعدها بـ١١ سنة ونصف".
واستطردت: "المهم أنا كان بقالى سنة بحاول أخلى شعرى كيرلى طبعًا هى معاناة بجد بس عشان أصمد اشتريت باروكة عشان ألبسها فى الشغل لحد ما شعرى يظبط ويتحسن وجيت فى وقت بصيت للباروكة كده وقلت تفتكرى هتحتاجيها في يوم لو أخدت كيميائى وده ماكنش يقين بس هى فكرة خطرت على بالى وأول ما خلصت السنة وشعرى ابتدى يتحسن ويبقى كيرلى حصلت المفاجأة أنى بالصدفة أحس أن فى حتة بلية كده فى جسمى وفورا رحت أشوف إيه دى ومن هنا ابتديت الرحلة، عملت الفحوصات والتحاليل واتشخصت وعملت العملية وأخدت الكيماوى وبعدها الإشعاعي".
واستكملت لينا شاكر: "الحقيقة أن ماخدتش الخبر ده زى بقية الناس أن صحيح جالى لحظة الانهيار كانت وأنا بعمل المموجرام وماكنتش لسه اتشخصت بس لأنى كنت بدعى ربنا أنه ياخذنى وأنا على رجلي وفي صحتي وكنت متصورة أنه هيكتبهالى بس فى اللحظة دى زعلت لأني ابتديت أحس أنا داخلة على إيه وفكرنى بكل اللى عيشته مع ماما والحقيقة أنى مش عايزة أعيشه تانى مع أي حد عزيز أو غالى عليا وكنت فاكرة أنى خلاص أخدت نصيبى من المرض فى كل اللى عيشته وشفته مع أمى بس اتضح أنه كاتب لى غير كده وأسرع مما كنت أتخيل أنا كنت بقول أكيد هيجيلى كانسر زى ماما بس متخيلتش أنه يكون بدرى كده وأنا عندى ٤٣ سنة وادينى عرفت بنفسى الإحساس ودوقت جلسات الكيماوى والإشعاعى كمان.
واختتمت: "أنا بكتب كل الرغي ده عشان أوصل للإحساس اللي عندي دلوقتي أن أنا مش زعلانة ومش خايفة أنا بس طالبة منه اللطف، وأنا قدها إن شاء الله، وزى أما كانت أمى بتعمل كانت بتستحمل وراضية، وحمداه طول الوقت وقوية، أنا كمان هكون زيها".
