المعلم هريدي يكتب: نشرة أخبار «مهيس ولا متيس»

محمود طاهر: 7 ملايين جنيه تكلفة حملتي الانتخابية.. ليه نازل انتخابات الرئاسة.

الخطيب عن تصفية الحسابات مع معارضيه حال فوزه: عيب الأهلي عائلة واحدة.. مش عارف ليه افتكرت جملة «أسرة مع بعضينا» في فيلم الباشا التلميذ.

محمود طاهر: انتخابات الأندية الرياضية وجاهة اجتماعية.. بـ7 ملايين جنيه.

محمود طاهر: لن أفصح عن أسباب استبعاد حسام البدري لـ«عماد متعب».. علشان أنا أصلًا مش عارفها.

محمود طاهر: الخطيب صديقي وأخلاقه لا تسمح له بالهجوم عليّ.. أصيل والله يا أبو نسمة.

صالح جمعة يعتذر لـ«الأهلي» وجمهوره: «أعدكم أن أعود أفضل وأقوى».. يموت الزمار وصوابعه بتلعب.

«شيرين» تتخلى عن مدير أعمالها وتؤسس مكتبا إداريا للشئون الفنية.. دا إحنا هنشوف فضايح الفترة الجاية.

البرازيل تحقق في تحويلات قطرية غامضة قيمتها 22 مليون دولار.. ابعت يا اللى بتبعت، دا أحلى من الشرف مفيش.

تشكيل تكتل دولي في أوروبا للدفاع عن حقوق العمال في قطر.. مسكوا القط مفتاح الكرار.

«عزلوه وكرموه».. عيد ميلاد موجابي عطلة رسمية في زيمبابوي.. خلى الشعب يعيش.

«فيس بوك» تطرح خاصية جديدة لرصد محاولات الانتحار.. الخاصية دي لو اشتغلت في مصر هتتقل وتهنج من كتر الانتحار.

هاني سري الدين: انتخابات الأهلي مُعرضة للإلغاء.. يسمع من بقك ربنا، خلينا نفرح بالجو الديمقراطي الجميل.