وليد فكري: 7 فروق تكشف الكتب الأصلية والمزورة

حذر الكاتب الشاب وليد فكري تنبيه قرائه عبر حسابه الخاص بموقع التواصل الاجتماعي «فيس بوك»، من الوقوع في فخ الكتب المزورة وكيفية التفريق بينها وبين الكتب الأصلية.

وشرح فكري طريقة التمييز بين الكتب الأصلية والمزورة قائلًا:
-كتب دار الرواق ما بتنزلش محطوطة في غلاف بلاستيك زي بتاع المجلات.. المزور محطوط في غلاف بلاستيك.
-الكتاب المزور ألوانه باهتة ومش واضحة.. في حين إن كل كتبي الصادرة عن دار الرواق ألوانها واضحة جدًا.
-الكتاب الأصلي مطبوع على ورق مصنفر خشن بحروف سودا.. الكتاب المزور مطبوع على ورق رخيص خفيف والخط حتلاقيه فاتح عن الأسود.. رمادي تقريبًا.
-لو لقيت خط الكتابة فيه اهتزاز أو بهتان يبقى دا كتاب مزور لأن كتب الرواق بتكون طباعتها متقنة جدًا.
-كتاب "دم الخلفاء" عنوانه مكتوب بطباعة بارزة فوق الغلاف بعكس الكتاب المزور.
-أسعار كتبي: تاريخ شكل تاني 45ج - تاريخ في الظل 45ج - دم المماليك 35ج - دم الخلفاء 35ج.. بيكون عليهم تخفيضات في المعارض وأحيانًا المكتبات الكبيرة بتعمل تخفيضات في مناسبات مختلفة... لكن لو لقيت السعر أقل بدون تخفيض معلن والطباعة مريبة يبقى ثق علطول إن دا كتاب مضروب.
-أخيرًا.. كتبي بتكون صادرة في المكتبات الكبرى وعلى رأسها "أ" وديوان والشروق وفيرجين ومكتبة "بيت الكتب" في إسكندرية ومكتبة رافي في إسكندرية والشبكة العربية والمكتبات "الكبيرة الثابتة".. اللي على فراشات الجرايد أو مع الباعة الجائلين دا مزور.

أخيرًا.. «والكلام مش عن كتبي لوحدي.. كقاعدة دار الرواق إصداراتها مش مرتفعة الأسعار.. واللي بيزورها بيبيعها بفرق 5 أو 10 جنيهات بطباعة رديئة.. فأنت لما تجيب المزور أنت في حقيقة الأمر بتغش نفسك لأن الكتاب عمره الافتراضي معاك حيكون أقل ومش حيكون مريح في القراءة.. دا لو تغاضينا يعني عن الجانب الأخلاقي».