بالفيديو.. أوكا وأورتيجا يرويان القصة الكاملة للقبض عليهما
روى أوكا وأورتيجا قصة القبض عليهما أثناء لقائهما في برنامج "معكم" مع الإعلامية منى الشاذلي، المذاع على فضائية سي بي سي، وقال أوكا إنه توجه للمطار مع أورتيجا وهناك تفاجأ بضابط ينادي على أسمائهما، وبمجرد أن تم حجزهما وتوقيفهما تذكرا مشكلتهما مع الضرائب.
وتابع أوكا: "كان عندنا مشكلة مع الضرايب ففكرنا إن ده السبب ومجاش في دماغنا إنه التهرب من الجيش وقعدنا 3 ساعات مش عارفين فيه إيه ولا فاهمين قاعدين ليه وبعد 3 ساعات ناس خدونا وقالوا لنا هنعرف وإحنا ماشيين وطول الوقت كنا مفكرين الضرايب".
وقال أورتيجا إنه ذكر هو وأوكا كل شيء بالتفصيل، مضيفًا: "قلنا كل حاجة بصراحة يعني أنا والدتي مطلقة من 15 سنة وأنا أكبر إخواتي ولي حق الإعفاء لأنه كبير عيلة".
وأضاف أوكا: "كنا مقدمين على الجيش كبار والمفروض من سن 20 سنة يقدم الشاب فدي الحاجة الوحيدة اللي كانت مقلقانا إننا سبنا كذا دفعة واتأخرنا شوية وخفنا نروح نقدم يحصل لنا مشكلة ففيه حد أوهمنا إنه هيعرف يخلصها ومش هنتأذى".
وواصل: "أول ماقالوا لنا إنتوا متهربين قعدنا نبص لبعض وقلنا الحقيقة اللى حصل وإنه مدير أعمالنا قال لنا مفيش تزوير وراح لعب من ورانا في القيد العائلي".
