مرتضى منصور: «رئيس المقاصة كداب وانتهازي ولو أبوريدة راجل يرد»
شن مرتضى منصور رئيس مجلس إدارة نادي الزمالك، هجومًا حادًا على الثنائي هاني أبوريدة عضو مجلس إدارة اتحاد الكرة وثروت سويلم المدير التنفيذي للجبلاية.
وقال رئيس الزمالك: «أنا عايز راجل يطلع ويقولي إن الورق وجدول المباريات اللى معايا مزور، ولو إنت راجل يا هاني أبوريدة أو ثروت سويلم تطلعوا تردوا عليا.. أنا معايا جدول بيقولي إن مباراة المقاصة يوم السبت، وبعدين بتأجلوا المباراة على مزاجكم».
وتابع: «خطاب الجبلاية اللى طلع واتقال أن الأمن وافق على إقامة المباراة، انا هاخده وأروح إلى وزير الداخلية أعرف مين العسكري اللى ضرب الخطاب ده، لأن الأمن مطلعش خطاب بالكلام ده».
وقال: «أنا كنت فاكر عبد السلام راجل محترم بعتلى خطاب وقالى أنا هطلب تأجيل علشان مينفعش نتعامل كده من اتحاد الكرة، يرجع في كلامه علشان انتهازي وعايز ياخد نقاط المباراة.. ويا محمد عبد السلام أنت راجل كداب، ولو دكر صحيح اطلع وكدبني ومصر كلها عرفت حقيقتك خلاص، ويا اتحاد الكرة أنت مُحل ومفيش فيكم راجل ومش هنلعب المباراة».
وكان الزمالك أعلن عن رفضه خوض المباراة بعد رفض اتحاد الكرة تأجيلها، في حين يؤدي الفريق الأبيض تدريبه اليوم على ملعب عبد اللطيف أبورجيلة استعدادا لمباراة طلائع الجيش المقبلة.
