أحلام الشباب تظهر في «لو هتبقى ريس».. مصطفى: هفكر في الفقراء.. عبد الرحمن: هخلي الزمالك بطل الدوري.. صلاح: هقفل تويتر.. فهمي: هكرم أبو تريكة.. أحمد: هسافر اشتغل.. وشريف: هعيشكم في بذخ

دشن نشطاء موقعي التواصل الاجتماعي "فيس بوك وتويتر"، هاشتاجًا بعنوان "لو هتبقى ريس"، الذي تصدر تراند مصر على تويتر، وقد تفاعل معه النشطاء بشكل كبير، معبرين عن أحلامهم ورغباتهم لو كانوا رؤساء، حيث أكد البعض أنهم يريدون أن يقدموا إصلاحات في التعليم والزراعة والصناعة ومكافحة الفساد، بينما علق آخرون بشكل ساخر.

الفقراء
قال مصطفى رشاد: "لو هتبقى ريس.. هفكر في الفقراء وازاي أقدر أساعدهم وأخليهم كويسين وربنا هيخليني سبب في إسعادهم بجد"، وأضاف عبد الرحمن أحمد:" هخلي الزمالك بطل الدوري لعشر سنين قدام.. لو هتبقى ريس".
وعلق صلاح: " لو هتبقى ريس.. هقفل تويتر عشان محدش يهاجمني فيه"، وردت نوريا "لو هتبقى ريس.. حلغي التعليم من البلد".
وتابع أكرم باشا: "لو هتبقى ريس.. هعزم على كل مواطن بكرسي الحكم لمدة يوم".

السفر
وقال محمد داوود "مش حمنع حد من السفر وأخليكم كلكم تسافروا وأقعد أنا براحتي في البلد كلها"، وأضاف إسلام زناتي: "لو هتبقى ريس.. ههتم بالزراعة والصناعة وهشيل كل الإعلام ده كله وتنظيم الطرق وتجديدها جميعًا والاهتمام بالصناعات الحرفية".

ورد شريف غتواري "هعيشكم في بذخ"، وتابع محمود جاد " أول حاجة هعملها ومن غير زعل يعني هتنحى".

العدل
وقال إبراهيم عصام: " هنقل كلية آداب وصيدلة جنب هندسة لرفع الروح المعنوية للمهندس"، وأضاف سيد عبد السلام: "العدل ثم العدل ثم العدل هعلن الحرب على التعليم والفقر والجهل".

وعلق ماريو سليمان ":" حملة اعتقالات بالجملة لأي موظف مش بيراعي ربنا في شغله سواء بقي وزير أو عامل نظافة... هراعي ربنا في شعبي وأوفرلهم احتياجتهم"، ورد محمود: "هرجع الملكية تاني وهبسط الشعب دهب وفلوس.. لو هتبقى ريس".

وتابع فهمي أيمن: "لو هتبقى ريس.. هكرم أبو تريكة هنفي شيرين من مصر هسمع كل ألبومات عمرو دياب حتى لو مش بحبه هروح أعيش في تيران وصنافير".

دولة مؤسسات
وقال أحمد حسام: "هستغل القوة البشرية اللى بتعمل المستحيل والقوى العقلية إلى بتبني المستقبل"، وأضاف أنس علام: "لو هتبقى ريس هخلي الدولة دولة مؤسسات وهخلي فيه عقاب للي يخرج عن العدالة والكرامة الإنسانية".
وعلق كاظم الماجيك:"هفتح التالتة الشمال والتالتة يمين عشان دي الحاجة الوحيدة اللي بتصبر الناس الكورة"، ورد عبد الله جوهر:" مش هنام غير لما الجعان يشبع".
وتابع أحمد شريف:"هغير منظومة التعليم والصحة بالكامل وهتجه لتصليح المناطق العشوائية وهنشط السياحة واستفاد بكٌل قطعة أثار في البلد".
وسخرت ندى: "لو هتبقى ريس.. هخلي البنات يمسكوا كل المناصب المهمة في البلد"
وقال رامي: "لو هتبقة ريس هقيل الحكومة وأحل البرلمان وأرجع دستور 1923 وأعلن الحريات العامة، وأرجع باسم يوسف وكل اللي برة افتح الباب للمعارضين".