كان نفسي أخرج للدنيا.. قصيدة لنور عيسى

كان نفسى اخرج للدنيا واشوف العالم كله
اخرج بره إطار أفلام الهندى والكارتون
كان نفسى اركب لمبه نيون في مخى الضلمه
واتعامل ويا البنى ادمين عادى
وابقى طبيعيه وسط اللمه
وعشان كده قررت اخرج للدنيا
واشوف الحياه كامله
ولما خرجت ،، حسيت بعدم الأمان
شعور بالخوف عمره ما يحسه إنسان
اخدت جنب وقعدت فترة عقبال ما استوعبت
بصيت قدامى اتخنقت تعبت
زى ما اكون طفله وتايهه في الحياه
بصيت في عيون الناس
كان نفسى اصرخ واقول ياااه
للدرجادى الناس وحشين
دانا شوفت عيون جبارين
وشوفت عيون بريئه بس قليلن
كان نفسى اخرج للدنيا
ولما خرجت نسيت انا ابقى مين
كان في كويسين اه
بس الكتير وحشين
وانا كنت خايفه وحاسه انى لوحدى
مع أن اصحابى حوليا
كان نفسى ارجع للبيت
واهدى النور على مخى شويه
واشيل اللمبه النيون
واشغل أفلام الهندى والكارتون
مع كيس الشيبسى والشكولاته
وفى نص الفلم اروح في النوم