بختك اليوم.. من هريدى نيوز

يا تكون محظوظ يا تكون منحوس ..حظك عندنا فى هريدى نيوز.. ولو بختك طلع مايل.. اوعى تضرب بوز

الحمل
رغى ولكلك.. خف تعوم وشوف نفسك كام يوم وسيبك من اللى يسيبك وركز فى اللى شاريك.
صحيا: لو تفاءلت مش هتموت افرد فردة الشراب المقلوبة اللى متركبة تحت مناخيرك.. هتجيب نتيجة.

الثور
البلد ما فيهاش شغل وإنت بتفكر تتعطف وتتنازل وتسيب شغلك.. ارجع لعقلك وبلاش تعمل أراجوز عشان حبيبك.
صحيا: لو فضلت ع الحال ده مش بعيد تتجنن..عد من 1 الى 500 قبل ما تضرب حد.

الجوزاء
اتشرط واتفرد واتنى.. اليوم يومك وما حدش شريكك.. توأم روحك زعلان صالحه ببوكيه فجل.
صحيا: ابعد يا شيطان ابعد يا شيطان .. إن جه م الباب قوم سد الباب بحجر صوان.

السرطان
الإنسان صحيح عبارة عن شوية أخطاء فوق بعض.. الغيرة ما حدش جابلها سيرة ما تقطعش إنت فى فروتها.
صحيا: نام نام نام.. وما تفكرش تاكل حمام ولا حتى عصافير.

الأسد
اهدى وفكر واعقل وارسيلك على قارة فى الشغل وفى الحب والعبرة بالنهاية.
صحيا: الكسل وحش حاول تتخلص بدل ما تنام على البلاط.

العذراء
جيّالك فلوس كتير.. ما تضيعهاش على البلالين واللعب.. حاول تكبر مرة وتفكر تفتح "حصالة" فى أقرب بنك.
صحيا: حب السنين مش هيضيع لو فكرت تسيبه يومين يستجم وإنت كمان تستحمى.

الميزان
التسرع.. التسرع.. مرض الجنس البشرى على رأى الست شجر الدر فى الفيلم إياه.. حاول تتخلص منه ولو ما عرفتش اسأل الست تحية كاريوكا
صحيا: دكتور للتخمة.. ودكتور للأسنان.. جاتها نيلة اللى عايزة "ميزان".

العقرب
كله تمام أخيرا تقدر تشم نفسك شوية.. استنى.. ما تشمش دلوقتى.. غاز.. مولوتوف.. قش رز.. الحمد لله ما فيش قش رز السنة دى لإن ما فيش رز أصلا.. شهيييييق.
صحيا: بعد الشهيق والزفير.. خد معاك بخاخة لإن التلوث هيسببلك حساسية.. أو التهاب رئوى.. أو ربو.. أو اختناق مؤقت على الأقل.
القوس
ما تسمعش لحد من اللى بيخلوك تزعل على نفسك دول ما بيحبوش نجاحك وما تخليش مشاغلك تبعدك عن حبيبك.
صحيا: القهوة والشاى والسجاير.. أو تعلق رقبتك فى باب الأوضة بحبل.. النتيجة واحدة.
الجدى
إنت النهاردة زى "الأنبوبة" حلو وملفوف والكل بيدور عليك.. لكن لو الضغط زاد هتنفجر.
صحيا: قول "سا سى سو" "سا سى سو" 7 مرات ده تمرين تريح بيه نافوخك شوية.

الدلو
الدنيا دوارة ومن شارع ممكن تتنقل حارة.. بلاش تبذير وعيش فقير تموت أمير.
صحيا: قابل ناس جديدة وغير مودك ونظم أكلك.. الحياة ملل "السنين".

الحوت
يا أبو إحساس عالى "علق خرزة زرقاء" العين عليك وإنت نجمك خفيف وقلبك نظيف.
صحيا: تجنب المناطق الموبوءة بالأمراض كالمطبخ والحمام وتحت السرير.