رئيس التحرير
عصام كامل
Advertisements
Advertisements
Advertisements
Advertisements

"شاعر رحال" قصيدة لـ "مينا إميل يوسف"

Advertisements

شاعر رحال بهوى التجوال
بعمل ندوات من غير أموال
وبروح لنجوع وبلف ربوع
في كل مصر يوم في الأسبوع
رحت الصعيد في مكان بعيد
ما أنا أصلي مصابر قوي وعنيد

يوم في الشرقية يوم في الغربية
وفي يوم تاني الدقهلية
ومشيت في الخضرة وشفت جبال
وغرزت في طينة وفي أوحال
وبدون مال بكتب موال
لا يهمني فقر ولا ضيق حال
ما أنا أصلي عاشق للأشعار
باتحدى الصعب بكل إصرار
بامشي في أمطار وفي جو حار
وحلمي أوصل لكل دار
وإزاي أنا حطلع في التلفاز
والكل مركز مع صافيناز
ولا عمر حد لشاعر انحاز
والله ده ظلم واستفزاز
والذوق العام بيعاني من عبده موتة وألماني
جاهل بيألف أي أغاني وما فيش ودان سمعاني
الشعب عاشق للرقاص لا يهم شاعر ولا حتى قاص
نص الشعب بقى هجاس والنص التاني قاعد أقفاص
وما عدش حاجة اسمها ثقافة الكل بيسمع أي هيافة
بلياتشو يهبل أي ظرافة وكتبنا اتدفنت جوة أرافة
أحمد شوقي والعقاد كتب اندهست تحت أنقاض
والورق استخدم في المرحاض والشعب لشهوة بقى منقاد
والكل بيسمع مهرجانات ويشوف التت وشعبيات
يا زمن أوكا وأورتيجا الشعرا انتحرت في الصالونات
يا مصر فين حق الشعراء الذوق العام صابوا وباء
ولا في حل ولا دواء ميئوسة الحالة بلا شفاء
إزاي ممكن أقول أشعار في زمن الحالة بقت عار
وإزاى نقدر نكتب ببلاش في ظل غلو الأسعار
لو جبت دينا في الصالونات ترقص بالبدلة وبالصاجات
الجمهور حيسيب أشعارنا ويجري ينقط بالدولارات
ما تقوليش اعمل دواوين بالذمة مين حيشتري مين
الشعب كله ماشي شمال وأنا لوحدي ماشي يمين
عايز ثورة يا شعراء الشعر ماشي إلى فناء
كفاية خلفات في ما بنا الصراعات في ما بنا غباء
أنا ليه يا رب أطلع شاعر ما الكل ماشي بلا مشاعر
ابعدوا عن الشعر يا ولادي ده طريق الشعر طريق واعر
لكن أنا مكمل في طريقي ورق الشعر هو رفيقي
ما هو كان طريقه واعر غصب عني ما هو صديقي
وبنام ويجينى في أحلامي مهما بنام بيجيني تاني
مرافقني في فرحي وأحزاني بيجيني ولا يوم ينساني
عايز أعمل أنا حلقة زار يمكن يطلع عفريته
ده ملازمني بكل إصرار لازق بغرا يخرب بيته
لكن أعمل أيه ما أنا حبيته وهو في دمي وهويته
كل وقتي أنا اديته على كل شيء أنا بديته
في النهاية أحب أقول كلام العقل والأصول
عايزين نتجمع كلنا وبالصبر أكيد حننول
ترجع مصر بلد ثقافة بلد جمالها خرافة
بالتعب لازم حنوصل ما فيهاش صانعة لطافة
هي دي بلدنا مصر مبدعين ما لهم حصر
قصر الثقافة أحلى قصر وشعب مثقف أكبر نصر
Advertisements
Advertisements
الجريدة الرسمية