"معاً ضد الإخوان" تتهم الجزيرة بحرق منطاد الأقصر.. والنشطاء مختلفون.. أسامة: لماذا صورت الجزيرة وحدها الحادث.. مروى: الحادث مصور بكاميرا موبايل
اتهمت صفحة "معًا ضد الإخوان المسلمين" على الفيس بوك قناة الجزيرة بأنها المسئولة عن انفجار المنطاد السياحى الذى وقع صباح اليوم بالأقصر، معللة الأمر بالفيديو المصور والذى أذيع حصريًا على قناة الجزيرة للحظة انفجار المنطاد واحتراقه.
وقال أدمن الصفحة:" عمركم شفتوا بجاحة أكتر من كدة إنهم يصوروا الحادثة وهى بتحصل.. ولو حد قال صدفة.. طب اشمعنا المنطاد ده اللى أتصور صدفة وفى 100 منطاد بيطيروا يوميًا فى سماء الأقصر"؟
وذكر أدمن صفحة معًا ضد الإخوان "أكرر شهادتى أن قطر هى المسئولة عن الحادث وهى من دبرته لخراب مصر وهدم السياحة".
اتهام الصفحة فتح باب التكهنات لدى نشطاء الفيس بوك، حيث قال إسلام على "نفس كلامك ده الإخوان قالوه على "أون تى فى" لما صورت قطر البدرشين"!
وقالت هبة رمضان "والله لسه كنت بفكر فى كده وأنا بشوف الفيديو معلش"، فيما تساءل أسامة صدى "لماذا قناة الجزيرة هى أول من صور البالون أثناء احتراقه وهو لا يزال بالجو؟ لماذا قناة الجزيرة أول من صور الأرض بعد سقوط البالون المحترق بدقائق؟ كيف وصل المراسل وسيارة البث والكاميرا إلى المكان بعد الحادث بدقائق فى مدينة الأقصر! الأقصر وليست القاهرة"!
إزيس سليب قالت "ماشى خليهم يخربوها على مرسى"، فى حين علق زاهى برونى قائلًا" الجزيرة ستدمر مصر كما دمرت ليبيا واليمن والعراق وسوريا وأفغانستان".
أما فرح فلافى فأضافت "مش بعيد أبدًا يكونوا فعلاً عاملوا كده عشان يخربوها خالص .. الله يخرب بيتك يا مرسى على قطر على أى دولة بتكرهنا".
وعلق جوزيف بشارى "قطر من أهم أهدافها قتل السياحة علشان تقدر تشترى المنشآت السياحية بتراب الفلوس وبعدين ترجع السياحة مرة أخرى بعد ما تكون سيطرت على السياحة أو سيناريو آخر قتل السياحة فى مصر لتنشط فى إسرائيل لأنها المنافس الأول للسياحة فى مصر تحيا حكومة الإخـــــــوان إلبس ياشعب"
ودافع رومنى مايكل قائلاً " مفيش حد دلوقتى مش معاه كاميرا أى حد ممكن يصور ويبعت لأى قناة أو يرفعها على اليوتيوب والقناة تستخدم الفيديو عادى يعنى"، وأضافت دكتورة مروى عبد المتعال "بس ده متصور بالموبايل يعنى كان ممكن يكون واحد مصوره وأرسله ليهم".
