مارى منيب، ملكة الضحك التي دخلت الفن بـ"وصلة ردح" لنجيب الريحاني
ماري منيب، ممثلة كوميدية خفيفة الدم، أشهر من قدمت أدوار الحماة في السينما، وأطلق عليها وصف حماتي قنبلة ذرية، أدت ببراعة أدوار المرأة المتسلطة سليطة اللسان، هي ملكة الضحك في الزمن الجميل قدمت أروع أدوارها مع فرقة نجيب الريحاني، اختيرت ضمن أحسن عشرة نجوم للكوميديا من الرجال والنساء، وضمن أحسن خمس ممثلاث للكوميديا في العالم العربي، ورحلت في مثل هذا اليوم 21 يناير عام 1969.
كانت ماري منيب من الفنانين من الذين تراهم فتلمس فيهم أخلاق وتصرفات بالأصول ودون ابتذال ويظهر ذلك في أعمالهم مما يجعلك تحترمهم ولا تنسى ما قدموه للفن، فنانة متواضعة وهي في عز شهرتها ومجدها، نجمة كبيرة في المسرح والسينما لم تتغير، أخلاقيات لم تعوض ولم تتكرر.
وكما نشرت مجلة الاذاعة عام 1966 تحت عنوان (ماري منيب تدخل فرقة الريحاني بالردح) طلبت المذيعة أبلة فضيلة توفيق من ماري منيب لتسجل معها في برنامج الأطفال وكانت متعبة وفي بداية مرضها وتقوم بأحد الأدوار في المسرح، إلا أنها عندما علمت أن هناك أطفالًا يطلبون رؤيتها وافقت فورًا على اللقاء المسجل.
الإجابة على سؤالين معقدين
تقول ماري منيب: كان عندي الليلة في المسرح إخواننا بتوع الإذاعة، جاءوا ليسجلوا معي لقطة غريبة شوية لكن دمها خفيف سألتني المذيعة الظريفة سؤالين فقط، لكنهم سؤالين عقدة بصحيح يخلوا الواحد محتاج خمس ساعات عشان يفكر ويرد عليهم في خمس دقائق.
وأضافت الفنانة مارى منيب: كان السؤال الأول بيقول: ما هو اليوم اللي مر في حياتي وأتمنى أن ربنا يرجعه ويخليه يمر بيَّ تاني زى ما حصل زمان بالضبط من غير أي تغيير، والسؤال الثاني عكس الأول على طول الخط: ما هو اليوم اللي مر من أيام حياتي وأمنيتي لو أنه يرجع بي تاني علشان أقدر أغير اللي حصل فيه وأخليه ما يحصلش.
كيف كانت خائفة ومكسوفة من الريحاني
تعلق ماري منيب وتقول: إيه الأسئلة دي يا خويا اللي الناس الرايقين دول بيقعدوا يفكروا وينقوا فيها عشان يدوخونا ويحيرونا، المهم بعد ما دوخت واحترت عرفت برضه أجاوب شوفوا قلت ايه: اليوم يا حبيبتي اللي أحب إنه يتكرر تاني في حياتي زي ما حصل هو يوم ما قابلت الراحل نجيب الريحاني لأول مرة في حياتي كنت لسه ممثلة جديدة طالعة في المقدر جديد، وأولاد الحلال أخدوني علشان يعرفوني بيه، رحت وأنا مخضوضة وخايفة ومرعوشة، طبعًا حقابل الفنان العظيم اللي مكسر الدنيا في المسرح والسينما، كنت مش عارفة راسي من رجليَّ، بص لي كدا وقال لي تعرفي تمثلي يا شاطرة، قلت له أيوا بصوت منخفض مرتعش.
قال لي الريحاني مثلي دور بنت ذوات دلوعة بتتدلع على علشان تخليه يغازلها وهو ماشي مش واخد باله، ولأني كنت مكسوفة لم أقنعه بأدائي، ولأني كنت لسة مش متودكة زي دلوقتِ، فأحس الريحاني بي وقال لي طب وريني إزاي واحدة بنت بلد بملاية لف بتقابل جوزها اللي سابها وراح اتجوز عليها وأول مرة تشوفه بعد جوازه.
تقول ماري منيب: أقول لكم الحق الوقت ده كان جوزي فوزي منيب سايبني وراح اتجوز واحدة تانية وأنا من جوايا بغلي غليان ومش عارفة أفش غلِّي إزاي، ما صدقت الريحاني طلب مني المشهد إلا ونسيت كسوفي وخجلي ورحت مفتوحة كأني بلاعة، وكأني بالعة مش بس راديو لأ محطة إذاعة بحالها، وردحت ردح للست اللي مش شايفاها ولا هياش قدامي، خلصت وصلة الردح واتفتحت في العياط، في اليوم ده أصبحت عضوة في فرقة الريحاني وربنا ما يجيب اليوم اللي يخليني أتركها أبدًا.
تفضل أن يرجع أولادها صغارًا
وتستكمل ماري منيب: أما اليوم اللي أحب أنه يرجع تاني علشان أقدر أغير اللي حصل فيه، فهو اليوم اللي ولادي كبروا فيه، فضلت أراعيهم وأربيهم وأقول لهم يا رب تكبروا يا حبايبي، إمتى أشوفكم يا حبايبي قدام عيني كده رجالة وستات متستتين فى بيوتكم وأفرح بيكم وأملا عينيَّ بأولادكم وأولاد أولادكم، وأتاري اللي بتمناه طلع مش ولا بد، كبروا العيال بصحيح وكترت مشاكلهم وبعد ما كنت عاوزة أستريح لقيتني شايلة هم كل واحدة يعني جوزوها تتأخر جابت لي دا راخر، وأصبحت عاملة زي أم الهموم، وهو ده بقى اليوم اللي أتمنى لو يرجع يتعاد تاني عشان أغير اللي حصل فيه وأخلي ولادي وبناتي يرجعوا كتاكيت من تاني على الأقل أصغر أمًّا كمان زيهم.