سيد حجاب يكتب: رسالة إلى الأب الصديق صلاح جاهين

تحت عنوان (عشر كلمات عند افتراق الطريق) كتب الشاعر سيد حجاب قصيدة يرثى فيها الشاعر الفنان صلاح جاهين ونشرتها مجلة "صباح الخير" عام 1997 قال فيها:

سامحنى يا صاحبى البريء الجميل.. وإحنا هناك على بوابات الرحيل
سيبتك وسيبت البوابات تاخدك.. ورجعت عاجز كليل
سامحنى ــ مهما قلت ـــ قولى قليل... لاهو أد حبى ليك ولا أدك
وأى قول بعدك قليل وهزيل... ياللى ضمير مصر النيل ودك
دخل الربيع يضحك لقانى كسير.. والقلب على حزنه الكبير انطوى
راح اللى راح ماعادش فاضل كتير.. راح اللى بالأمر المحال اغتوى
راح..لأ..مارحش..ده حل فينا وتوى..توى ما بين الحلم والإمكان
فيضان عطايا سقى العطاشى وروى
وغسل خطاياك بأزماننا البخيل.. نوى في ليل مصر الطويل الطويل
يجن ع المجاريح إذا الريح عوى.. وحل فينا وبينا حادى ودليل
ماراحش لأ..بكره يعود م السفر..ينفض تيان يطير غبار النجوم
من بين أيديا أبويا راح من سنين..بكيت وأنا بين ايديه
أخذت عزاءه وأعزى أحبابه فيه.. ليلتها داقت روحي حزن الرجال
وفى يوم رحيلك يا صلاح يا جاهين..الكون فضى ووقفت أنا لوحدى
مين اللى دس السم في قهوتك.. الكدب في الجرانين ع الأرصفة
أنت في مكان ولا أنا..شايلك في قلبى غالى زى الضنا
اكمن قلبك ياما لجل انضنى.. حين كنت بكريك يا بكرى الغنا
أنا بكرة مستنيك تعود من بعيد.. علشان تكمل لى بواقى الكلام