رئيس التحرير
عصام كامل
Advertisements
Advertisements
Advertisements

يا حكومة ارحمينا من المتحرشين بـ"الضبطية".. ساخرون

اسماعيل يس
اسماعيل يس
يا فتاح يا عليم يا رزاق يا كريم.. أصبحنا وأصبح الملك لله.. ابتدينا رحلة حرق الدم والنكد.. إنها رحلتى اليومية مع سواقي الميكروباص.. اللى فيها العكننة ألوان.. وحكايات من ألف ليلة وليلة كمان.. وحسرة على أيام زمان.. ونلعن الأيام السودة اللى عايشها سعادة السواق وإن كان عاجبنا كمان.


طب هو أنت عمال تعاكس في خلق الله ليه وكل واحدة معدية جنبك سواء بعربية أو على رجليها معدية مش عاتقها ليه هو أنت شكلك مش في كامل تركيزك ليه وحاسس إنك تايه أو إنك شربت حاجة اصفرا على الصبح ولا إيه.. اه يا آني يا شلاضيمي تعبتوني من عمايلكم كل يوم اصطبح بواحد شكل، وكلكم زي بعض إيه الحكاية ما فيش ضابط ولا رابط ليه..هو أنت ما سمعتش عن قانون المرور الجديد وإنه هيضبطكم؟ هو أنتم مش عاملين حساب ولا احترام للركاب.. هو فيه إيه محسسني أن الركاب شغالين عند اللي خلفوكم.. 

إننى أشعر بالتوهان، شلاضيم بُقى لا تحتمل، يا خسارة شلاضيمك يا سمعمع، هي فين الحكومة تقر الضبطية القضائية للقبض على سائقي الميكروباص  المتحرشين ولا حتى الركاب اللي بيضايقوا الستات والبنات..وكمان تعممها على المتحرشين والمبرشمين..هي سايبة الناس دي متوغلة بينا ليه.. إيه يا عم مدبولي إيه يا برلمان فين القوانين وتطبيقها.. هو إحنا ماعندناش قوانين تجرم التحرش والا إيه  وليه ما بنفعلهاش واللي يغيظك إنه لما واحد من المتحرشين يتمسك ييجي لك ولاد الحلال وكمان ولاد الحرام يقولولك ما تضيعش مستقبله ويفضلوا هااات يا تحايل على الضحية لحد ما تتنازل عن تقديم بلاغ وعن عمل محضر.

لازم ولا بد من توعية الناس بالداهية دي قبل ما نصحي على صوت واحدة بتصوت ولا متحرش الناس قفشوه وعملوا فيه زي ما عملوا في الدكتورة بتاعت السلام.




 فين الجمعيات "النسوية" ؟ وفين المجلس القومي للمرأة؟ وفين الدكتورة مايا مرسي؟ لزما وحتما ولابد تكون هناك ندوات ومؤتمرات لتعريف المرأة بحقوقها وإكسابها مهارات التعامل مع المتحرش.. خاصة وأن العقوبة هي الحبس مدة لا تقل عن سنة وبغرامة لا تقل عن خمسة آلاف جنيه ولا تزيد على عشرة آلاف جنيه أو بإحدى هاتين العقوبتين إذا تكرر الفعل من الجانى من خلال الملاحقة والتتبع.

إنني أري البعض قاعدين مستلوحين ومجعوصين كده ولا كأنهم لاعاملين مصيبة ولا حاجة.زإننى أشعر بالغليان  من هذا الذي كان والنبى ياخويا سواقين الميكروباص هيجننونى.. وفى الرايحة والجاية بيستكردونى وبالستات والبنات يتحرشون.. ومش عايزين  يسيبوهم في حالهم .. يا جماعة حرام على اللي خلفوكم.. واللي جابوكم وكفاية عليكو كده بقا.. سلامو عليكوووووووووووو.

Advertisements
الجريدة الرسمية