Advertisements
Advertisements
الأربعاء 19 مايو 2021...7 شوال 1442 الجريدة الورقية
Advertisements
Advertisements

كل الغلابة في الطابور واقفين..| ساخرون

ساخرون شلاليت عم فريد طه
شلاليت

فريد طه



شلاليت


سايق عليك النبي فهّمني ياسيدي

ماتخلنيش أتخنق من كتر تنهيدي

عايزين بقي نشوف قرار منك يريحنا

ويحل أزمة غلاء بتزيد في تنهيدي




كل الغلابة بشوفهم في الطابور واقفين

وأنا وسطهم كل يوم عايش مع الصابرين

أرجع لبيتي مانيش عارف أقول لك إيه

عايزك تقول السبب وتريح الملايين



أنا قمت بالثورة لاجل اللقمة وغموسها

وقلت طبعا شباب الثورة يحرسها

ونفسي أعرف لفين رايحين بدون إزعاج

وقول لنا نعمل إيه وبلاش تتربسها



عايزين قرار ثوري يسعد كافة المساكين

ورغيف وحبة غموس لكافة الجعانين

مش محتاجين كل حبه نشكي أوجاعنا

ونفسنا والنبي نقدر نسد الدين



إسكت بقي يافريد بتشكي للناس ليه ؟!

خمسين سنه وإنت ساكت إيه حكايتك إيه؟!

أنا نفسي أقول لك يا سيدي الخلق مش طايقة

وأعمل إيه ولا إيه من اللي عايش فيه



على كل حال بُكرة تعرف سر كلماتي

واللي بقوله حقيقة الخلق بتهاتي

وأعمل إيه والنبي علشان رغيف العيش

مع أبويا وأمي وابني ومراتي


Advertisements
Advertisements
Advertisements
Advertisements