Advertisements
Advertisements
الجمعة 5 مارس 2021...21 رجب 1442 الجريدة الورقية
Advertisements
Advertisements

إسماعيل ياسين في سوق السمك: أين أنت يا جهاز حمايتي؟!

ساخرون اسماعيل ياسين
إسماعيل ياسين

واضح أن دوام الحال قد أصبح أكيد من المُحال، آه والنبى يا أخويا زي ما بقولك كده.. أنا دماغي هتتدشدش ولا أدري ماذا أقول ولا أعلم ماذا أفعل.. آه يا شلاضيمى يانى يا ماما..

ده أنا خلاص تعبت من الأسعار اللي عمالة تاكل في جتتي طول الشهر.. وإحنا ما صدقنا إن الأسعار نزلت شويتين في الفترة اللي فاتت، لكن يبدو أن السادة التجار غاويين جشع وينغصوا علينا عيشتنا، طب والنبى حد يقولهم يرحمونا وكفاية علينا المنغصات النسائية التي نشهدها صباحا ومساء.

أين أنت يا جهاز حماية المستهلك، ده أنا أخدت بعضي ونزلت سوق السمك أشتريلي بلطيتين للعيال بدل الجمبري اللي سعره لم يعد في متناول أمثالي من الموظفين، ويا ريتني لا رحت ولا جيت.. يا داهية دقي ووسعيلي بوقي.. السمك سعره زاد من تاني وبقت زي أسعار الأول بالتمام والكمال.

قال إيه يا أخويا الكيلو اللى كان من شهر بـ23 جنيه نط فجأة وأصبح بـ35 جنيه.. يعني لو عايز لى بلطيتين كل واحدة كيلو هدفع 70 جنيه.. يعني قرب من سعر الجمبري يا أبو الشلاضيم.. طب خليه عندكم بقى.. وربنا يسامحني قدام العيال.

أين أنتم يا نواب البرلمان.. يوه!! قصدى أين أنتم يا نواب الشعب.. إننى أشعر باللخبطة.. زغردى يا نعيمة.. نوابنا مأنتمين مع الحكومة.. كل حاجة سعرها بيزيد ما عدا أنا.. المرتب كما هو وما فيش حد عايز يزودنى في سوق البنى آدمين.

ده حتى تاجر السمك مش عايز ياخد ويدى معايا في الكلام وبيقولي مش عاجب جنابك روح لأقرب شادر، وما فيش على لسانه غير وأنا أعملك إيه.. دى أسعار حطاها الغرفة التجارية بذات نفسها.

روح يا "شبار" -أصل اسمه المعلم شبار السماك- أنت والغرفة التجارية بتاعتك دي.. ده أنا ياما نفسي أدب شوك السمك جوه عينك.. يا شبار يا أجوف يا خياشيمي يا أنا يا أما.. منفوخ قوي يا أخي زى الحوت كدا ليه؟! ماحنا كلنا عارفين إن بتوع الغرفة التجارية هما نفسيهم كبار تجار السمك والجمبري واللحمة وكل حاجة! ربنا يجعل كلامى خفيف عليهم.. آه والنبي.. ده أنا غلبان أوى يا عمي.. يلا بقا.. سلامو عليكوووووووووووووو
Advertisements
Advertisements
Advertisements
Advertisements