ماجدة خير الله تدخل على خط أزمة مها أحمد والسقا وكرارة: إنتي مين بقى

دخلت السيناريست ماجدة خير الله على خط أزمة الفنانيين مها أحمد وأحمد السقا وأمير كرارة، وتساءلت عما قدمته مها أحمد لتتطاول على زميليها قائلة:

"قدمتي ايه في حياتك يذكرك الجمهور به علشان تتطاولي على ناس  بتنجح وتفشل وتقع وتقوم تاني، ولا تتوقف عن الاجتهاد ومحدش منهما دخل هذا المجال بالواسطه ورمي الجته!"

وكتبت ماجدة خير الله تدوينة على الفيس بوك:  "وهو طبيعي أن ممثل أو ممثلة يطلب من  زميل نجم  أن يرشحه في أي دور من المسلسل اللي هو بيشتغل فيه، متجاهلا ان فيه حاجه اسمها مخرج وشركة إنتاج؟ هما المسؤولين عن تسكين وتوزيع الأدوار.

أضافت: لما مايكونش فيه دور مناسب لهذا الممثل او الممثلة العشمانة تشتغل في مسلسل الممثل النجم، تقوم تسخر منه وتهزأه وتقول عليه ندل، يعني ياتشوفلي شغلانة معاك، يا اما اسيحلك وابهدلك واتريق عليك.

استكملت: احنا بنهاجم اللي بيشغل مراته، طب ايه اخبار اللي يشغل صحابه حتي لو مش مناسبين، حد يفهمنا كيف تدار المسائل في الوسط الفني، وسط العجائب والاعاجيب، والشغل بالواسطة ورمي الجته؟"

السقا وكرارة
وقالت ماجدة عبر الفيس بوك: "أحمد السقا، وأمير كرارة اشتركا في بطولة اكثر مسلسلات هذا العام فشلا، لكن كل منهما يستند إلي تاريخ من النجاح التجاري يمتد لعشرين عاما علي الاقل، إنتي مين بقي وقدمتي ايه في حياتك يذكرك الجمهور به علشان تتطاولي علي ناس  بتنجح وتفشل وتقع وتقوم تاني، ولاتتوقف عن الاجتهاد ومحدش منهما دخل هذا المجال بالواسطه  ورمي الجته!"



كانت الفنانة مها أحمد أثارت جدلًا، خلال الساعات الماضية، بسبب حديثها عن الفنانين أحمد السقا وأمير كرارة، ومهاجمتها لهما زاعمة  بأنهما قبلا الإساءة لنفسيهما رضوخًا للمخرج محمد سامي من أجل زوجته مي عمر خلال الاشتراك في مسلسل "نسل الأغراب"، ما دفع والدة أحمد السقا وكذلك شقيقته للدخول على خط الأزمة، ومهاجمة مها أحمد.

عوضي على الله
بدأت الأزمة عندما مها أحمد تدوينة عبر صفحتها الشخصية بالفيس بوك "عوضي على الله دى الجملة اللى دايما بقولها لما اتصدم في أشخاص، الحكاية يا سادة نجمين عملوا مسلسل واتنجمت عليهم بنوتة لسه ألف باء تمثيل واديتهم على قفاهم وركبت عليهم إلى أن أصبحت بطلة المسلسل وبطلة الدعاية للمسلسل وهما راضيين رغم إن طول عمرهم مبيعملوش كده مع أي زميلة لهم أقربها أنا".

وقالت: "النجم الأولاني بيني وبينه عيش وملح وزمالة، رشحت في مسلسل بطولته وكان بيقنعني بدور ولما وافقت بعتولي دور تاني معرفوش، دور متعملوش واحدة مبتدئة، المفروض إنه عارف قيمتى الفنية وعارف إنى إضافة له، اتهرب مني وموقفش جنبى وباعني رغم إن الكل عارف إنى زي أخته.. ندل".

الحوجة مرة

استطردت مها قائلة: "التانى كان في بداياته يتمنى يسلم عليا ويقولى يا أستاذة، نزلت من نفسى وقلتله مش هنشتغل مع بعض ما هى الحوجة مرة، رد وقالى الدور بينادي صاحبه طبعا محتلكوش قد ايه ندمت نفسى وعشت أسود أيام حياتى عياط واكتئاب وقلت عوضى عليك يا رب".

وتابعت "تمر الأيام والاتنين يعملوا ويتجمعوا مع بعض في مسلسل واحد (على عينهم طبعا) ويمثلوا وحش قوى تمثيل الكفار وطلعوا كمان مبيقروش اللى بيمثلوه وربنا يركب عليهم بنوتة سنة أولى تمثيل وخبرة ويتحول المسلسل والدعاية الدراما كاملة لصالحها وهما (مخدماتية للأستاذة)".

كمبارس النجمة
واختتمت هجومها قائلة: "يمهل ولا يهمل، ابدأوا من جديد يا أوفر تمثيل ياللى مبتقروش يا كمبارس جنب النجمة. نصيحة بلاش تتشطروا على اللى كان بينكم وبينهم عيش وملح بلاش تتشطروا على أساتذتكوا. عوضنا على الله. يارب متحوجنا لحد حتى ولو كان أقرب الناس لينا".