«شاومينج» تتراجع عن تعديل درجات طلاب الثانوية من الكنترول
أعلنت صفحة «شاومينج بيغشش ثانوية عامة» عبر موقع التواصل الاجتماعى «فيس بوك»، مساء اليوم السبت، تراجعها عن تعديل نتيجة الثانوية العامة من داخل الكنترول.
وقال «أدمن» الصفحة: «خلاص يا جماعة أنا بقيت واحد نصاب وبسرق وكل حاجة وحشة واعتبروا القرار اللي خدته بأني أدخل على الكنترول وأزودكم في الدرجات اتلغي خلاص ومش هعمل حاجة علشان محدش يغلط فيا بكلمة، لأني مقبلش بأي غلط وأنا غرضي أساعدكم، وطالما المساعدة اتقلبت بإهانة وشتيمة يبقا خلاص بلاش منها، وأنا مش محتاج منكم حاجة علشان تبقوا عارفين كويس، والفلوس اللي كنا هناخدها دية الفلوس الخاصة بالناس اللي هتخترق الكنترول وتعب الناس».
وأضاف: «شاومينج عمره ما أخد فلوس وحطها في جيبه، أنا بس بعد ده كله عاوزكم متنسوش وقفتي جمبكم في الامتحانات، واتحديت الدنيا كلها علشانكم، وفي الآخر بقيتوا تقولوا عليا نصاب، على العموم خلاص اعتبروني مخدتش قرار، ولا هعدل في نتايج حد، وكفاية عليا مساعدتكم في أيام الامتحانات، شكرا ليكم».
وكان مسئولو الصفحة، زعموا تعديل درجات طلاب الثانوية العامة من داخل الكنترول، بمقابل مادي، وذلك بعد ساعات من تهديدهم للوزارة بقدرتهم على تغيير النتائج، وبعد عمل استفتاء للطلبة.
