السبت 30 مايو 2020
رئيس التحرير
عصام كامل

محمد عمر السنوطي يكتب: بكتبلها ف رمضان

محمد عمر السنوطي
محمد عمر السنوطي

وبكتِب لها كلمة حُب وعقلي يقول: "بلاش ...رمضان"



وقلبي يقوللي: "إيه يعني؟.. وليه هيوقَّفك رمضان؟

ومِن إمتى كلام الحُب... بيستنَّى مكان وأوان؟

وهوّا حرام تفرَّحها.. وتسعدها بغرام وحنان؟

دا رمضان شهر فيه الخير وفيه الود والإحسان

ورمضان فاهم أن إنتو في أشواقكم بقالكو زمان

وياما صُمتوا في هواكم وياما صبرتوا ع الكتمان

وعارف نيِتك لها خير لا قاصد لف ولا دوران

دا لو رمضان هيتكلِّم يقوم ينطق بألف لسان".

 "أنا عايزك لَها تكتب بقلب حبيب وروح فنان

كلامك ليها يبهرها تشوف الدنيا فيه ألوان

ولو تقراه كده بصوتها تحِسهُ أغاني ليها ألحان

وتنسى نفسها ف حُبك ويحلالها كده النسيان

وتستنَّى كلام مِنَّك وتبقى كِلمتَك إدمان

بلاش تبقى حَجَر صايم

أنا عايزك تكون إنسان

ما تعملنيش أنا حِجًّة وقوم أكتب كمان وكمان

قُصاد الحرف لَها منَّك أنا اكتبلك جَبَل غُفران".

Last Update : 2020-05-23 12:22 PM # Release : 0067